وزیر اعلی کاپن بجلی منصوبوں کی جلد تکمیل پر زور

ہماری توانائی کی طلب کو پورا کرنے کیلئے جموں و کشمیر کی پن بجلی کی صلاحیت میں اضافہ ضروری ہے:عمرعبداللہ
جموں//
وزیر اعلیٰ عمر عبداللہ نے آج یہاں سول سکریٹریٹ میں جموں کشمیر اسٹیٹ پاور ڈیولپمنٹ کارپوریشن لمیٹڈ (جے کے ایس پی ڈی سی) کے ایک جائزہ اجلاس کی صدارت کی جس میں نئے پن بجلی منصوبوں پر عمل درآمد میں پیش رفت اور ان منصوبوں سے بجلی کی پیداوار میں متوقع اضافے کا جائزہ لیا گیا۔
اجلاس میں وزیراعلیٰ کے مشیر ناصر اسلم وانی، وزیراعلیٰ کے ایڈیشنل چیف سکریٹری دھیرج گپتا، پرنسپل سکریٹری پاور ڈیولپمنٹ ڈپارٹمنٹ (پی ڈی ڈی) راجیش ایچ پرساد، پرنسپل سکریٹری فنانس سنتوش ڈی ویدیا، منیجنگ ڈائریکٹر جے کے ایس پی ڈی سی پنکج مگوترا اور دیگر سینئر افسران نے شرکت کی۔
اجلاس کے دوران وزیراعلیٰ نے ان منصوبوں کی بروقت تکمیل کی ضرورت پر زور دیا تاکہ ان کی عوامی افادیت کو یقینی بنایا جاسکے اور زیر تعمیر منصوبوں کی صورت میں کنٹریکٹ کے مسائل، وقت اور مالی اوور رن جیسے چیلنجز سے نمٹنے کی اہمیت پر زور دیا گیا۔
اجلاس میں اگلے پانچ سالوں کیلئے روڈ میپ پیش کیا گیا جس میں توانائی کی بڑھتی ہوئی ضروریات کو پورا کرنے کیلئے صلاحیت میں خاطر خواہ اضافہ دکھایا گیا ہے جس سے آہستہ آہستہ بجلی کی درآمدات پر انحصار کم ہوگا ، اور ریاست کی توانائی کی خود کفالت میں اضافہ ہوگا۔
اجلاس میں آئندہ منصوبوں، تفصیلی پراجیکٹ رپورٹ (ڈی پی آر) کی تشکیل اور جائزہ پر بھی تبادلہ خیال کیا گیا اور جے کے ایس پی ڈی سی سے کہا گیا کہ وہ دریائے چناب، جہلم، راوی اور سندھ پر پن بجلی کے اثاثوں کی ترقی کیلئے اسٹریٹجک منصوبے کی منصوبہ بندی پر توجہ مرکوز کرے۔
پائیدار توانائی کیلئے حکومت کے عزم پر روشنی ڈالتے ہوئے وزیر اعلیٰ نے عہدیداروں پر زور دیا کہ وہ رکے ہوئے منصوبوں کی بحالی کے منصوبوں کا مطالعہ کریں اور ان پر موثر طریقے سے عمل درآمد کریں۔ انہوں نے جے کے ایس پی ڈی سی کو درپیش چیلنجوں سے نمٹنے کیلئے ایک فعال نقطہ نظر پر زور دیا اور اس بات پر زور دیا کہ ہماری توانائی کی طلب کو پورا کرنے کیلئے جموں و کشمیر کی پن بجلی کی صلاحیت میں اضافہ ضروری ہے۔
وزیر اعلیٰ نے کہا کہ پن بجلی منصوبوں پر بروقت عمل درآمد جموں و کشمیر کی بجلی سرپلس ریاست کے طور پر صلاحیت کو کھولنے کیلئے ضروری ہے۔’’ میں تمام اسٹیک ہولڈرز پر زور دیتا ہوں کہ وہ چیلنجوں سے فعال طریقے سے نمٹیں اور عوامی مفاد کی خدمت کیلئے جاری کاموں میں تیزی لائیں‘‘۔
قبل ازیں پرنسپل سیکرٹری پی ڈی ڈی نے جموں و کشمیر میں پن بجلی کی ترقی کی صورتحال کے بارے میں ایک جامع اپ ڈیٹ فراہم کی۔
خطے کی۱۸ ہزار میگاواٹ پن بجلی کی صلاحیت میں سے ۱۵ہزار میگاواٹ کی نشاندہی پہلے ہی کی جا چکی ہے جو اسے مستقبل کے توانائی کے منصوبوں کا اہم محرک بناتی ہے۔
اجلاس میں دریائے چناب پر بگلیہار ہائیڈرو الیکٹرک پاور پروجیکٹ (مرحلہ اول اور دوم)، دریائے سندھ پر اپر سندھ ہائیڈرو الیکٹرک پروجیکٹ (مرحلہ اول اور دوم)، بارہمولہ میں لوئر جہلم ہائیڈرو الیکٹرک پروجیکٹ سمیت کمیشن شدہ منصوبوں کا تفصیلی جائزہ لیا گیا۔
اجلاس میں زیر تعمیر منصوبوں پر بھی غور کیا گیا جن میں دریائے سندھ پر نیو گاندربل ہائیڈرو الیکٹرک پروجیکٹ (۹۳ میگاواٹ)، دریائے چناب کے تحت پکال ڈول ہائیڈرو الیکٹرک پروجیکٹ (۱۰۰۰میگاواٹ) اور راتلے ہائیڈرو الیکٹرک پروجیکٹ (۸۵۰میگاواٹ) شامل ہیں، جسے این ایچ پی سی اور جے کے ایس پی ڈی سی کے درمیان مشترکہ منصوبے کے ذریعے بحال کیا گیا ہے۔
تبادلہ خیال میں ان منصوبوں پر کام میں تیزی لانے کی اہمیت پر روشنی ڈالی گئی تاکہ ان منصوبوں کو جلد از جلد آپریشنل ہونے کو یقینی بنایا جاسکے۔