جلد ہی سوامی وویکانند ہوائی اڈے سے بین الاقوامی ہوائی سروس: نائیڈو

رائے پور/نئی دہلی//) شہری ہوابازی کے مرکزی وزیر کنجراپو رام موہن نائیڈو نے چھتیس گڑھ کی راجدھانی رائے پور کے سوامی وویکانند ہوائی اڈے سے جلد ہی بین الاقوامی ہوائی خدمات شروع کرنے پر اتفاق کیا ہے ۔ اس کے ساتھ ہی رائے پور ہوائی اڈے پر کارگو ہب بنانے کا عمل بھی جلد شروع کیا جائے گا اور رائے پور ہوائی اڈے سے پٹنہ اور رانچی کے لیے ہوائی سروس شروع کرنے کے لیے رضامندی دی گئی ہے ۔
مسٹر نائیڈو نے بدھ کو نئی دہلی کے راجیو گاندھی بھون میں چھتیس گڑھ کے وزیر اعلیٰ وشنو دیو سائی کے ساتھ ملاقات کے دوران یہ یقین دہانی کرائی۔ میٹنگ میں ریاست کے فضائی رابطے کو مضبوط بنانے اور علاقائی ہوائی اڈوں کی ترقی کے بارے میں تبادلہ خیال کیا گیا۔
مسٹر سائی نے رائے پور کے سوامی وویکانند ہوائی اڈے کو بین الاقوامی ہوائی اڈے کا درجہ دینے کا مطالبہ کیا۔ اس کے ساتھ ہی انہوں نے کہا کہ چھتیس گڑھ میں بین الاقوامی ہوائی خدمات کے بہت زیادہ امکانات ہیں۔ اس قدم سے ریاست کی اقتصادی ترقی کو فروغ ملے گا اور عالمی کنیکٹیوٹی میں اضافہ ہوگا۔
وزیر اعلیٰ نے چھتیس گڑھ میں بین الاقوامی مسافروں کی آمدورفت کو مدنظر رکھتے ہوئے رائے پور سے سنگاپور اور دبئی کے لیے براہ راست پروازوں کی ضرورت پر تبادلہ خیال کیا۔ انہوں نے کہا کہ ان راستوں پر مسافروں کی آمدورفت کافی اچھی ہے جس سے یہ خدمات تجارتی لحاظ سے منافع بخش ہوں گی۔
مرکزی وزیر ہوا بازی نے رائے پور کے سوامی وویکانند ہوائی اڈے سے جلد ہی بین الاقوامی ہوائی خدمات شروع کرنے کی تجویز سے اتفاق کیا ہے ۔
مسٹر سائی نے بتایا کہ اس وقت ریاست میں کارگو کی کوئی بڑی سہولت نہیں ہے اور رائے پور ہوائی اڈے کو مرکزی کارگو ہب کے طور پر تیار کرنے کی تجویز دی۔ انہوں نے کہا کہ اس سے زرعی اور باغبانی مصنوعات کی نقل و حمل کو فروغ ملے گا۔ مسٹر نائیڈو نے اس تجویز پر جلد کارروائی کا یقین دلایا ہے ۔
میٹنگ میں بلاس پور ایرپورٹ کو 3سی آئی ایف آر زمرہ میں اپ گریڈ کرنے کی تجویز بھی پیش کی گئی۔ اس کے لیے وزیر اعلیٰ نے ریڈیو نیوی گیشن سسٹم (ڈی وی او آر) کی تنصیب کا عمل جلد از جلد مکمل کرنے کی درخواست کی ہے ۔ بلاس پور ہوائی اڈے پر طیاروں کی نائٹ لینڈنگ میں درپیش مسائل کے پیش نظر مرکزی وزیر نے حکام کو ہدایت دی کہ وہ اسے فوری طور پر شروع کریں۔
مسٹر سائی نے امبیکاپور ہوائی اڈے کو رائے پور، وارانسی، پریاگ راج اور اجودھیا جیسے بڑے شہروں سے جوڑنے کے لیے نئی پروازیں شروع کرنے کا بھی مطالبہ کیا۔ انہوں نے کہا کہ خطے کی ثقافتی اور معدنی دولت کو دیکھتے ہوئے نئی فلائٹ سروس شروع کرنے سے لوگوں کو کافی فائدہ پہنچے گا، جس پر مرکزی وزیر نے بھی مثبت اقدامات کا یقین دلایا ہے ۔
میٹنگ میں وزیر اعلیٰ نے جگدل پور اور بلاس پور ہوائی اڈوں پر آر سی ایس پروازوں کے لیے مالی امداد کی بحالی کا بھی مطالبہ کیا۔ انہوں نے کہا کہ ان راستوں پر کنیکٹیویٹی بڑھانے سے علاقائی ترقی میں مدد ملے گی۔
مسٹر سائی نے کہا کہ جگدل پور اور رائے پور کے درمیان انڈیگو ایئر لائنز کے ذریعے چلائی جانے والی فلائٹ سروس کم مسافروں کی وجہ سے روک دی گئی تھی۔ اسے صحیح وقت پر دوبارہ شروع کرنے پر زور دیتے ہوئے انہوں نے کہا کہ بستر میں سیاحت کی بے پناہ صلاحیت کے پیش نظر اس راستے پر فضائی کنیکٹیویٹی کی بہت زیادہ مانگ ہے ۔
مرکزی وزیر نے دیگر تجاویز پر بھی مثبت پہل کی یقین دہانی کرائی ہے ۔
اس دوران چیف منسٹر کے سکریٹری راہل بھگت اور نئی دہلی میں تعینات چھتیس گڑھ کی سرمایہ کاری کمشنر ریتو سین بھی موجود تھیں۔