جلد ہی مزید 100 محلہ کلینک فراہم کئے جائیں گے: سسودیا

نئی دہلی// دہلی کے نائب وزیر اعلی منیش سسودیا نے کہا کہ کیجریوال حکومت دہلی کے لوگوں کو صحت کی بہتر سہولیات فراہم کرنے کے لئے پرعزم ہے اور اس سمت میں حکومت آنے والے وقت میں دہلی میں 100 نئے محلہ کلینک شروع کرنے والی ہے۔
ان محلہ کلینکس کی تعمیر کا کام آخری مراحل میں ہے۔ اس سلسلے میں پیر کو نائب وزیر اعلیٰ منیش سسودیا نے محکمہ صحت اور پی ڈبلیو ڈی کے اعلیٰ عہدیداروں کے ساتھ میٹنگ کی اور عہدیداروں کو ہدایت دی کہ ان کلینک کو جلد از جلد شروع کیا جائے، تاکہ عام لوگ اس کا فائدہ اٹھا سکیں۔
مسٹر سسودیا نے پیر کو محکمہ صحت اور پی ڈبلیو ڈی کے اعلیٰ عہدیداروں کے ساتھ میٹنگ کی اور عہدیداروں کو ہدایت دی کہ وہ جلد از جلد ان کلینک کو شروع کریں تاکہ عام لوگ اس سے فائدہ اٹھاسکیں۔
انہوں نے کہا کہ وزیر اعلیٰ اروند کیجریوال کی قیادت میں دہلی کا محلہ کلینک ماڈل نہ صرف ملک بلکہ پوری دنیا میں بنیادی صحت کے نظام کا ایک شاندار اور منفرد ماڈل ہے۔ انہوں نے کہا کہ دہلی کے ہر شہری کو پرائمری سطح پر صحت کی سہولیات تک آسان رسائی ہونی چاہئے، اس لئے ہم جلد ہی 100 نئے محلہ کلینک شروع کرنے جا رہے ہیں۔ ان کلینکس کی تعمیر کا کام آخری مراحل میں ہے اور جلد ہی یہ مکمل طور پر عام لوگوں کے لیے دستیاب ہوں گے۔
انہوں نے کہا کہ دہلی کے تمام محلہ کلینک کو ڈیجیٹائز کرنے کا کام بھی تیزی سے جاری ہے اور بہت سے محلہ کلینک مکمل طور پر ڈیجیٹائز ہو چکے ہیں، جہاں مریضوں اور ان کی بیماری سے متعلق معلومات ٹیبلیٹس کے ذریعے جمع کی جاتی ہیں۔ محلہ کلینک کسی بھی بیماری کی تشخیص کا پہلا پوائنٹ ہے۔ ان کے ڈیجیٹائز ہونے کے بعد یہاں سے آنے والے ڈیٹا کو دہلی میں کسی بھی جگہ پر کسی بھی بیماری کے پھیلنے سے پہلے اس کی تشخیص کے لیے استعمال کیا جائے گا۔ اس کے ساتھ ہی ڈاکٹر کو ایک کلک کے ذریعے مریضوں کی تمام طبی تاریخ معلوم ہو جائے گی۔ اس کی مدد سے ڈاکٹر مریض کا بہتر علاج کر سکیں گے۔
واضح رہے کہ اس وقت دہلی میں 519 محلہ کلینک ہیں جہاں پر 212 قسم کے ٹیسٹ اور تمام بنیادی ادویات سمیت تمام قسم کی بنیادی صحت کی خدمات لوگوں کو مفت فراہم کی جاتی ہیں۔