ساڑھے 6 سال بعد ڈیوڈ وارنر کے آسٹریلوی کپتان بننے پر عائد پابندی ختم

کینبرا //
کرکٹ آسٹریلیا نے ڈیوڈ وارنر پر کپتان بننے پر عائد پابندی ختم کردی۔ کرکٹ آسٹریلیا کے کنڈکٹ کمیشن نے ازسر نو جائزہ لینے کے بعد سابق اوپنر ڈیوڈ وارنر کے کپتان بننے پر لگائی گئی پابندی ساڑھے 6 سال بعد ختم کردی۔ انٹرنیشنل کرکٹ سے ریٹائراور لیگ کرکٹ میں متحرک ڈیوڈ وارنراب کپتان بن سکیں گے جب کہ 37 سالہ ڈیوڈ وارنر بی بی ایل میں بھی سڈنی تھنڈر کی کپتانی کرنے کے اہل ہیں۔
کرکٹ آسٹریلیا کے مطابق وارنرنے تمام معیار پورے کئے جس پر تین رکنی پینل نے پابندی اٹھائی۔
ڈیوڈ وارنر نے بھی کنڈکٹ کمیشن کو بیان دیا جب کہ پیٹ کمنز، اینڈریومیکڈانلڈ، گریگ چیپل، لیزاستھا لیکر اور کین ولیمسن نے سماعت میں کریکٹرریفرنس دیے۔ چیف ایگزیکٹو کرکٹ آسٹریلیا نک ہوکلے نے ڈیوڈ وارنر کے کپتان بننے پر عائد پابندی ختم ہونے پر خوشی کا اظہار کیا۔ واضح رہے کہ ڈیوڈ وارنر پر 2018ء میں دورہ جنوبی افریقہ کے دوران سینڈ پیپر سکینڈل کے بعد پابندی لگی تھی اور اس وقت کرکٹ آسٹریلیا نے ڈیوڈ وارنر پر تاحیات لیڈر شپ بین لگایا تھا۔