اسمبلی انتخابات:فیصلے کا دن آج

۹۰رکنی اسمبلی کیلئے مقابلہ کرنے والے ۸۷۳؍ امیدواروں کی قسمت کا فیصلہ منگل کی دو پہر تک طے ہو گا
جموں/ سرینگر//
جموں کشمیر میں۹۰؍ اسمبلی حلقوں کیلئے ووٹوں کی گنتی منگل کی صبح شروع ہوگی، جو انتخابی عمل کا آخری مرحلہ ہوگا، جس سے مرکز کے زیر انتظام علاقہ ۲۰۱۹ کے بعد پہلی بار منتخب حکومت حاصل کرے گا۔
۲۰۱۹ میں بھارتیہ جنتا پارٹی(بی جے پی) کی قیادت والی مرکزی حکومت نے آرٹیکل۳۷۰ کو منسوخ کرکے ریاست کو دو حصوں ‘جموں کشمیر اور لداخ میں تقسیم کرکے اس کا درجہ ریاست سے گھٹا کر یونین ٹیریٹری کردیا تھا۔
پانچ سال بعد ہونے والے اسمبلی انتخابات میں کانگریس اور نیشنل کانفرنس اتحاد، پیپلز ڈیموکریٹک پارٹی (پی ڈی پی) اور بھارتیہ جنتا پارٹی (بی جے پی) اہم اسٹیک ہولڈرز ہیں۔
سیاسی جماعتوں کے امکانات کا جائزہ لینے کے بعد انتظامیہ پیر کے روز تمام ۲۰ ضلعی ہیڈکوارٹرز کے مخصوص مراکز پر سیکورٹی سمیت انتظامات کو حتمی شکل دینے میں مصروف تھی۔
الیکشن کمیشن کے عہدیداروں کے مطابق، گنتی کے تمام مراکز پر تین سطحی سیکورٹی کا انتظام کیا گیا ہے تاکہ اس بات کو یقینی بنایا جا سکے کہ شورش زدہ سرحدی مرکز کے زیر انتظام علاقے میں سب کچھ ٹھیک رہے اور سرحد پار سے دہشت گردی، شورش اور دراندازی کے بار بار واقعات پیش آ رہے ہیں۔
وادی کشمیر اور جموں خطے کے تمام مراکز میں سیکورٹی اہلکاروں نے پوزیشن سنبھال لی تھی اور وہ پہرہ دے رہے تھے۔
جموں و کشمیر میں ۲۰۱۴کے بعد پہلے اسمبلی انتخابات تین مرحلوں میں ہوئے تھے۔وادی کشمیر اور جموں خطے کی۹۰ نشستوں میں سے پہلے مرحلے میں۲۴، دوسرے مرحلے میں ۲۶ اور تیسرے مرحلے میں ۴۰ نشستوں پر ووٹ ڈالے گئے۔
۹۰رکنی اسمبلی کیلئے مقابلہ کرنے والے ۸۷۳؍ امیدواروں کی قسمت کا فیصلہ منگل کی دوپہر تک طے ہو سکتا ہے۔۲۰۱۴ کے اسمبلی انتخابات میں۵۲ء۶۵ فیصد کے مقابلے میں۲۰۲۴ میں۴۵ء۶۳ فیصد رائے دہی ہوئی۔
انتخابی میدان میں اترنے والوں میں نیشنل کانفرنس کے نائب صدر عمر عبداللہ (بڈگام اور گاندربل اسمبلی حلقوں سے)، پیپلز کانفرنس کے سجاد غنی لون (ہندواڑہ اور کپواڑہ سیٹوں سے)، پردیش کانگریس کمیٹی کے صدر طارق حامد قرہ (بٹہ مالو) اور بی جے پی کے ریاستی صدر رویندر رائنا (نوشہرہ سیٹ) شامل ہیں۔
دیگر قابل ذکر امیدواروں میں اے آئی سی سی کے جنرل سکریٹری غلام احمد میر (دورو)، پی ڈی پی رہنما وحید پرہ (پلوامہ)، التجا مفتی (بجبہاڑہ)، اپنی پارٹی کے صدر الطاف بخاری (چھانہ پورہ)، سی پی آئی (ایم) کے سینئر رہنما محمد یوسف تاریگامی (کولگام) اور سابق نائب وزرائے اعلیٰ مظفر حسین بیگ اور تارا چند شامل ہیں۔
ہفتہ کے روز ہونے والے ایگزٹ پولز نے این سی،کانگریس اتحاد کو اہم پوزیشن میں رکھا ہے اور علاقائی پارٹی کو بڑی تعداد میں نشستیں مل رہی ہیں۔
بی جے پی۲۰۱۴ کے اسمبلی انتخابات میں۲۵ نشستیں جیتی تھیںجبکہ ۱۰ سال پہلے ہوئے انتخابات میں۲۸ نشستیں جیتنے والی پی ڈی پی کو اس بار ۱۰سے کم نشستیں ملنے کی پیش گوئی کی گئی ہے۔
اگر ایگزٹ پول پر یقین کیا جائے تو پیپلز کانفرنس، اپنی پارٹی، غلام نبی آزاد کی ڈیموکریٹک آزاد پارٹی اور لوک سبھا رکن شیخ عبدالرشید کی عوامی اتحاد پارٹی سمیت نئی اور ابھرتی ہوئی پارٹیوں کو زیادہ موقع نہیں ملے گا۔آزاد امیدواروں کے ساتھ ان جماعتوں کو تقریباً ۱۰نشستیں جیتنے کی توقع ہے۔
اس دوران حکام کا بتایا کہ تمام ضلعی ہیڈ کوارٹروں پر ووٹوں کی خوشگوار اور ہموار گنتی کو یقینی بنانے کے لئے سیکورٹی کے کڑی انتظامات کئے گئے ہیں۔
انہوں نے کہا کہ ووٹوں کے مراکز کے گرد و پیش تین دائروں والی سیکورٹی کی تعیناتی کو عمل میں لائی گئی ہے ۔
حکام نے شفافیت، درستگی اور گنتی کے نتائج کے بروقت اعلان کو یقینی بنانے کیلئے نگرانی اور حفاظتی اقدامات، بیٹھنے کے اِنتظامات، اِی وِی ایم کی ٹرانسپورٹیشن اور کاؤنٹنگ ہال میں تکنیکی سیٹ اپ کو بھی حتمی شکل دی ہے ۔
حکام نے کہا کہ تمام نتائج کے اعلان اور پولنگ کا عمل۱۰؍اکتوبر کو مکمل ہونے تک سیکورٹی میں کوئی کمی نہیں کی جائے گی۔
ان کا کہنا ہے’’امید واروں کے صرف مجاز کائونٹنگ ایجنٹوں اور گنتی ڈیوٹی پر تعینات عملے کو ہی گنتی ہالوں کے اندر جانے کی اجازت ہوگی‘‘۔
حکام نے کہا کہ ہر امیدوار کے ووٹوں کی تعداد کا اعلان کاؤنٹنگ ہالز کے باہر پبلک ایڈریس سسٹم پر گنتی کے ہر دور کے بعد کیا جائے گا۔
جموں و کشمیر کی کل۹۰؍اسمبلی سیٹوں میں سے وادی کشمیر میں۴۷جبکہ جموں صوبے میں ۴۳سیٹیں ہیں۔
ان۹۰سیٹوں پر کل۸۷۳؍امید وار اپنی قسمت آزمائی کر رہے ہیں جب رائے دہندگان کی کل تعداد۸۸لاکھ سے زیادہ تھی۔
سال رواں کے ان اسمبلی انتخابات میں جہاں کالعدم جماعت اسلامی نے بھی آزاد امید وار کھڑا کئے اور جیل میں بند علیحدگی پسند لیڈر سرجان برکاتی نے بھی دو سیٹوں سے الیکشن لڑے وہیں جموں کے آر ایس پورہ میں والمیکی سماج اور پاکستانی پناہ گزنیوں نے پہلی دفعہ اپنے ووٹ کا استعمال کیا۔
جموں وکشمیر میں دس برسوں کے طویل عرصے کے بعد تین مرحلوں پر اسمبلی انتخابات منعقد ہوئے جن میں سے پہلا مرحلہ۱۸ستمبر کو جبکہ دوسرا اور تیسرا مرحلہ بالترتیب۲۵ستمبر اور یکم اکتوبر نو منعقد ہوا۔
حکام کے مطابق تینوں مرحلوں کی پولنگ انتہائی پُر امن اور خوشگوار طریقے سے انجام پذیر ہوئی تھی۔اسمبلی انتخابات میں ووٹنگ کی مجموعی شرح۴۵ء۶۳فیصد ریکارڈ ہوئی۔