پاک انگلینڈ سیریز؛ آخری لمحات میں ٹی وی معاہدے کا امکان

کراچی//
پاکستان اور انگلینڈ کے درمیان ٹیسٹ سیریز کے آغاز سے قبل آخری لمحات میں انٹرنیشنل نشریاتی حقوق کے معاہدے کی بازگشت سنائی دینے لگی۔
برطانوی اخبار کی رپورٹس میں دعویٰ کیا جارہا ہے کہ اسکائی اسپورٹس اور پاکستان کرکٹ بورڈ (پی سی بی) کے درمیان سیریز کیلئے براڈ کاسٹنگ رائٹس کا معاملہ آخری مراحل میں پہنچ گیا ہے۔
اسکائی اسپورٹس نے دسمبر 2022 میں انگلینڈ کے آخری دورہ پاکستان کی نشریات کی تھیں۔
رپورٹس میں کہا گیا ہے کہ یہ واضح نہیں کہ اسکائی اسپورٹس اور پی سی بی کے درمیان معاہدہ محض ایک سیریز کیلئے ہوگا یا طویل طویل المدتی ہوگا۔
دوسری جانب برطانوی نشریاتی ادارے اسکائی اسپورٹس کو امید ہے کہ معاہدے کو بروقت حتمی شکل دی جائے گی۔
واضح رہے کہ گزشتہ روز رات گئے انگلینڈ کرکٹ ٹیم پاکستان کیخلاف تین میچز پر مشتمل ٹیسٹ سیریز کھیلنے کیلئے ملتان پہنچ گئی ہے۔
دونوں ٹیموں کے درمیان سیریز کا پہلا ٹیسٹ میچ ملتان میں 7 اکتوبر سے شروع ہوگا جبکہ بقیہ میچز 15 اور 24 اکتوبر کو شیڈولڈ ہیں۔