کانگریس ۳۷۰ کی واپسی کی بات کرتی ہے لیکن مقبوضہ کشمیر کی واپسی کی نہیں :مودی

ہریانہ//
وزیر اعظم نریندر مودی نے منگل کو کانگریس پارٹی پر حملہ کرتے ہوئے ’اربن نکسل‘ کے الزام کو پھر سے زندہ کرتے ہوئے کہا کہ کانگریس جموں و کشمیر میں دفعہ ۳۷۰ کو بحال کرنے کا دعویٰ کرتی ہے، لیکن اس نے کبھی نہیں کہا کہ وہ پاکستان کے زیر قبضہ جموں و کشمیر (پی او جے کے) کو دوبارہ حاصل کرے گی۔
منگل کوہریانہ کے پلوال میں ایک عوامی ریلی سے خطاب کرتے ہوئے وزیر اعظم مودی نے الزام لگایا کہ کانگریس ایودھیا میں رام مندر کے خلاف ہے اور اس نے جموں و کشمیر میں کبھی بھی آئین کو مکمل طور پر نافذ نہیں کیا ہے۔
مودی نے کہا’’ہم اپنی بیٹیوں کی حفاظت، روزگار، اچھے بنیادی ڈھانچے اور سڑکوں کے لیے ووٹ دیں گے… کانگریس کا ایک ہی ایجنڈا ہے’اربن نکسل‘ ایجنڈا۔ وہ (کانگریس) کہتے ہیں کہ وہ جموں و کشمیر میں آرٹیکل۳۷۰کو واپس لائیں گے لیکن انہوں نے کبھی بھی پی او جے کے کو دوبارہ حاصل کرنے کا ذکر نہیں کیا۔ یہ بات ان کے منہ سے نہیں نکلتی۔ کانگریس نے کشمیر کو منقسم کر دیا ہے۔ وہ پی او جے کے کو واپس لانے پر بات نہیں کرتے ہیں لیکن آرٹیکل۳۷۰ کو بحال کرنا چاہتے ہیں۔ پاکستان کی حکومت نے کانگریس پارٹی کی حمایت کی ہے‘‘۔
وزیر اعظم نے کہا کہ کانگریس سب سے زیادہ دھوکے باز پارٹی ہے۔انہوں نے کانگریس کو ملک کی سب سے بڑی دلت مخالف پارٹی قرار دیا اور الزام لگایا کہ وہ ریزرویشن کو ختم کرنے کا ارادہ رکھتی ہے اور ہریانہ ان کی’ٹیسٹ اسٹیٹ‘ہے۔
مودی نے کہا کہ کانگریس نے ریزرویشن ختم کرنے کا منصوبہ بنایا ہے۔ ہریانہ ان کی آزمائشی ریاست ہے۔ لیکن جب تک مودی اور بی جے پی یہاں ہیں کوئی بھی ریزرویشن ختم نہیں کر سکتا۔ وہ مجھے اور (ہریانہ کے وزیر اعلیٰ) سینی جی کو دن رات گالیاں دیتے ہیں۔
وزیر اعظم مودی نے دعوی کیا کہ کانگریس نے ووٹوں کے لئے لوگوں کو پولرائز کیا ہے اور اس کا مقصد دلتوں اور پسماندہ طبقات کے لئے ریزرویشن کو ختم کرنا ہے۔
مودی نے کہا کہ کانگریس کا ایک ہی ایجنڈا ہے’’ ووٹوں کے لئے زیادہ سے زیادہ خوش کرنا۔ آج کانگریس دعویٰ کر رہی ہے کہ وہ دلتوں اور پسماندہ طبقات کے لئے ریزرویشن ختم کر دے گی۔ انہوں نے کرناٹک میں ایسا ہی کیا۔ جیسے ہی وہاں کانگریس کی حکومت بنی انہوں نے دلتوں اور پسماندہ طبقات سے ریزرویشن چھین لیا اور یونیورسٹیوں اور اداروں کو اقلیت قرار دے کر انہیں اپنے ووٹ بینک میں دے دیا‘‘۔
ہڈا خاندان کا حوالہ دیتے ہوئے وزیر اعظم نے ریاستی اکائی کے اندر مبینہ اندرونی لڑائی کے لئے اپوزیشن پارٹی کو تنقید کا نشانہ بنایا۔
مودی نے کہا’’یہاں کے لوگ ہریانہ میں کانگریس کے اندر تنازعہ دیکھ سکتے ہیں۔ کانگریس کے خلاف سب سے زیادہ احتجاج دلت، پسماندہ اور محروم طبقات سے ہے۔ دلت برادری نے فیصلہ کیا ہے کہ وہ باپ بیٹے کی سیاست کو آگے بڑھانے کے لئے مہرے نہیں بنیں گے‘‘۔
مودی نے مزید کہا کہ ہریانہ کی ریاست میں وہی حکومت بنانے کی تاریخ ہے جو مرکز میں برسراقتدار ہے۔
وزیر اعظم نے کہا کہ آپ نے دہلی میں تیسری بار بی جے پی کی حکومت بنائی اور اب آپ لوگوں نے ہریانہ میں تیسری بار بھی بی جے پی کی حکومت بنانے کا فیصلہ کیا ہے۔