این سی کانگریس اتحاد کا سورج طلوع ہونے سے پہلے ہی ڈوب گیا:ڈاکٹر جتیندر سنگھ

جموں//
وزیر اعظم دفتر میں تعینات وزیر مملکت ڈاکٹر جتیندر سنگھ نے جمعے کے روز کہاکہ نیشنل کانفرنس اور کانگریس اتحاد میں پھوٹ کے آثار نمایاں ہے۔
جتندر نے کہاکہ بی جے پی نے ماضی میں بھی انہیں شکست دی اور موجودہ اسمبلی انتخابات میں بھی بھاجپاحکومت بنانے میں کامیاب ہو جائے گی۔
ان باتوں کا اظہار وزیر جتندر نے کٹھوعہ میں چناوی ریلی سے خطاب کے دوران کیا۔
مرکزی وزیر نے کہاکہ مودی کی بدولت آج جموں وکشمیر میں امن و امان واپس لوٹ آیا ہے۔
جتندر نے کہا ’’دفعہ ۳۷۰کی منسوخی کے بعد جموں وکشمیر میں حالات یکسر تبدیل ہوئے اور آج کشمیر کے ہر علاقے میں ترنگالہرا رہا ہے‘‘۔
نیشنل کانفرنس اور کانگریس اتحاد میں پھوٹ پڑنے کا دعویٰ کرتے ہوئے مرکزی وزیر مملکت نے کہاکہ نیشنل کانفرنس کے نائب صدر عمر عبداللہ نے کانگریس لیڈر راہل گاندھی پر واضح کیا ہے کہ وہ کشمیر میں پرچار کے بجائے جموں صوبے پر اپنی توجہ مبذول کرئے۔
جتندر نے کہاکہ ہم نے پہلے ہی کہا تھا کہ نیشنل کانفرنس اور کانگریس کے درمیان جو اتحاد ہوا وہ زیادہ دیرتک پائیدار رہنے والا نہیں ہے۔
ان کے مطابق موجودہ مرکزی حکومت نے جموں وکشمیر کو نہ صرف امن کا گہوارہ بنایا بلکہ لوگوں کو ان کی دہلیزوں پر انصاف فراہم کرنے کی خاطر کوئی دقیقہ فروگزاشت نہیں کیا۔
مرکزی وزیر نے کہا’’جموں وکشمیر میں جتنے بھی تعمیراتی کام شروع کئے گئے انہیں وقت مقررہ کے اندرا ندر پایہ تکمیل تک پہنچایا جائے گا‘‘۔
جتندر نے الزام لگایا کہ علاقائی سیاسی پارٹیوں نے ہمیشہ مذہب کے نام پر سیاست کی لہذا ایسے سیاستدانوں کواب سبق سکھانے کی ضرورت ہے۔
مرکزی وزیر نے کہا کہ کانگریس لیڈر راہل گاندھی کو وزیر اعظم نریندر مودی کا شکریہ ادا کرنا چاہئے کیونکہ مودی نے کشمیر کو ایسا بنایا(پرامن) کہ راہل وادی میں برف کے گولوں کے ساتھ کھیلنے اور خوبصورت مقامات پر تفریحی کھیلوں میں مشغول ہوں۔
مرکزی وزیر نے کہا’’جب بھی کوئی وادی کشمیر میں راہل گاندھی کی تصاویر دیکھتا ہے تو یہ دیکھ کر خوشی ہوتی ہے کہ وہ لطف اندوز ہو رہے ہیں، جو اُس وقت کے بالکل برعکس ہے جب ان کی پارٹی مرکز میں برسراقتدار تھی اور اس وقت کی ریاست جموں و کشمیر کے ساتھ بھی اتحاد میں تھی‘‘۔ انہوں نے کہا کہ اس وقت راہول گاندھی اپنی سکیورٹی سے باہر نہیں نکل سکتے تھے اور انہیں اپنی بہن اور فیملی کے دیگر ممبروں کے ساتھ اپنے چھوٹے سے چیمبر کی دیواروں کے اندر محدود رہنا پڑا تھا، جس کی گواہی اس وقت کے کانگریس کے مرکزی وزیر داخلہ سشیل شندے نے دی تھی۔
جتیندر نے کہا کہ جب بھی راہل گاندھی اپنی بہن پرینکا گاندھی کے ساتھ برف کے گولے کھیلتے ہیں یا لالچوک میں چہل قدمی کے لئے جاتے ہیں یا شام کو ریزیڈنسی روڈ پر واقع ایک ریستوراں کا دورہ کرتے ہیں تو انہیں یہ احساس نہیں ہوتا کہ وہ نادانستہ طور پر کشمیر کی صورتحال سے نمٹنے اور ہم آہنگی بحال کرنے میں وزیر اعظم مودی کی کامیابی کی حمایت کر رہے ہیں۔