الیکشن کمیشن نے ہریانہ میں بھرتی سے متعلق جے رام رمیش کے اعتراض کو مسترد کر دیا

نئی دہلی// الیکشن کمیشن نے بدھ کو کہا کہ ہریانہ حکومت کی طرف سے سرکاری ملازمتوں کی بھرتی کے لیے دیا گیا اشتہار ماڈل ضابطہ اخلاق کی خلاف ورزی نہیں ہے کیونکہ یہ بھرتی کا عمل ریاست میں ضابطہ اخلاق کے نفاذ سے پہلے شروع ہو گیا تھا۔
کمیشن نے بدھ کو ایک ریلیز میں کہا کہ اس نے بھرتی کے عمل کو نہیں روکا ہے بلکہ اس نے ریاستی حکومت سے کہا ہے کہ وہ انتخابی عمل کی تکمیل کے بعد بھرتی کے نتائج کا اعلان کرے ۔
الیکشن کمیشن نے کہا ہے کہ کانگریس کے لیڈر جے رام رمیش نے اسے ایک خط لکھا تھا جس میں کہا گیا تھا کہ ریاست میں ماڈل کوڈ آف کنڈکٹ کے نفاذ کے بعد حکومت نے نوکریوں کی بھرتی کے لیے اشتہار جاری کیا ہے ۔ کمیشن نے کہا کہ اس نے اس سلسلے میں ریاستی حکومت سے تفصیلات طلب کی ہیں۔ ریاستی حکومت نے کہا ہے کہ بھرتی کا یہ عمل ضابطہ اخلاق کے نفاذ سے پہلے شروع کیا گیا تھا۔
کمیشن نے ریاستی حکومت کے جواب سے موصول ہونے کے بعد مسٹر رمیش کے اعتراض کو مسترد کر دیا ہے ۔
الیکشن کمیشن نے اس سال جنوری میں اسی طرح کے ایک معاملے میں اپنے رہنما خطوط کا حوالہ دیتے ہوئے واضح کیا ہے کہ ریاستی پبلک سروس کمیشن اور اسٹاف سلیکشن کمیشن ماڈل ضابطہ اخلاق کے نفاذ کے دوران باقاعدہ بھرتی اور پروموشن کا عمل جاری رکھ سکتے ہیں۔ کمیشن نے کہا ہے کہ غیر آئینی اداروں کو اس کے لیے کمیشن سے منظوری لینا لازمی ہوتا ہے ۔