ایک منتخب حکومت کو پرچم لہرانے سے روکنا انتہائی افسوس ناک : سسودیا

نئی دہلی// عام آدمی پارٹی کی لیڈر اور دہلی کی وزیر آتشی کے ہاتھوں 15 اگست کو روک لگائے جانے پر شدید ردعمل ظاہر کرتے ہوئے پارٹی کے سینئر لیڈر منیش سسودیا نے کہا کہ یوم آزادی کے موقع پر منتخب حکومت کو دہلی میں پرچم لہرانے سے روکنا انتہائی افسوس ناک ہے ۔
دہلی میں یوم آزادی کے موقع پر جھنڈا لہرانے کے معاملے پر مسٹر سیسودیا نے کہا کہ منتخب حکومت کو دہلی میں پرچم لہرانے سے روکنا انتہائی افسوسناک ہے ۔ انہوں نے کہا کہ تہاڑ جیل سے گینگسٹر سکیش کا خط فوری طور پر لیفٹیننٹ گورنر وی کے سکسینہ تک پہنچتا ہے اور وہ اس پر کارروائی بھی کرتے ہیں لیکن منتخب وزیر اعلیٰ کا خط ان تک نہیں پہنچتا ہے ۔ انہوں نے کہا کہ یہ بہت بدقسمتی کی بات ہے کہ یوم آزادی کے مبارک موقع پر سستی کی سیاست کی جا رہی ہے ۔
دریں اثنا آپ کی سینئر لیڈر آتشی نے بھی کہا "آج ایک منتخب حکومت کا جھنڈا لہرانے کا حق چھینا جا رہا ہے ۔ آج ایک نیا وائسرائے دہلی آیا ہے جو کہہ رہا ہے کہ وہ جھنڈا لہرائیں گے ۔ 15 اگست کو ترنگا لہرانا دہلی کے لوگوں کا حق ہے ، دہلی کے لوگوں کی منتخب کردہ حکومت کو ان کے حق روکنا تو ڈکٹیٹرشپ کی سب سے بڑی مثال ہے ۔
انہوں نے کہا کہ ہم 15 اگست کو ترنگا لہراتے ہیں کیونکہ 15 اگست 1947 وہ دن تھا جب ہندوستان کے لوگوں کو خود حکومت کرنے کا حق ملا تھا۔ اس سے پہلے ہندوستان پر انگریزوں کی حکومت تھی جو ایک وائسرائے کو ہندوستان بھیجتے تھے اور وہ اپنی مرضی کے مطابق اپنی حکومت چلاتے تھے ۔ ہندوستان کے لوگوں کو اس حکومت میں کوئی حق نہیں تھا۔
آپ کی لیڈر آتشی نے کہا کہ ہم 15 اگست کو جمہوریت، آزادی، ہندوستان کے لوگوں کے حقوق کے لیے آواز بلند کرنے کے لیے ترنگا لہراتے ہیں، لیکن آج ایک منتخب حکومت کا پرچم لہرانے کا حق چھینا جا رہا ہے ۔ آج ایسا لگتا ہے جیسے دہلی میں کوئی نیا وائسرائے آ گیا ہے جو کہہ رہا ہے کہ وہ خود جھنڈا لہرائے گا۔