’امرناتھ یاترا کیلئے سیکورٹ سخت‘۔۔۔حفاظت کے علاوہ دوسری تمام سہولیات کا بہترین انتظام کیا گیا ہے

سرینگر//
سالانہ امرناتھ جی یاترا کے آغاز سے ایک ہفتہ قبل جموں وکشمیر کے لیفٹیننٹ گورنر منوج سنہا کا کہنا ہے کہ یاترا کے کامیاب انعقاد کو یقینی بنانے کیلئے سخت حفاظتی بندو بست کے ساتھ ساتھ دوسری تمام ترسہولیات کا بھی بہترین انتظام کیا گیا ہے ۔
یہاں راج بھون میں ورچول’پرتھم پوجا‘میں شرکت کرنے کے بعد انہوں نے میڈیا کو بتایا’’۲۹جون سے ملک بھر کے یاتری بابا امرناتھ کا درشن کر سکتے ہیں جس کے لئے تمام تر ضروری انتظامات کو حتمی شکل دی گئی ہے اور سیکورٹی کا بھی سخت بندو بست کیا گیا ہے ‘‘۔
سنہا کا کہنا تھا کہ شرائن بورڈ اور جموں وکشمیر انتظامیہ نے یاتریوں کے لئے خصوصی انتظامات کئے ہیں۔
ایل جی نے کہا کہ گذشتہ دو برسوں کے دوران یاتریوں کیلئے کی جانی والی سہولیات میں کافی بہتری آئی ہے ۔
لیفٹیننٹ گورنر نے کہا کہ گھپا کی طرف جانے والی سڑکوں کو اپ گریڈ کیا گیا ہے اور بارڈر روڈس آرگنائزیشن نے اس سال کچھ حصوں کو کشادہ بھی کیا ہے ۔انہوں نے کہا’’میں سمجھتا ہوں کہ اس سال یاتری ہموار اور احسن طریقے سے یاترا کریں گے ‘‘۔ان کا کہنا ہے کہ یہاں ہمیشہ تمام مذاہب سے وابستہ لوگوں نے یاترا کی حمایت کی ہے ۔
ایل جی نے کہا’’میں لوگوں خاص طور پر ان علاقوں کے لوگوں جہاں سے یاترا نکلتی ہے ، کو اپیل کرتا ہوں کہ وہ اپنی دیرینہ روایت کو زندہ رکھتے ہوئے یاترا کی بھر پور حمایت کریں اور یاتریوں کا خیال رکھیں‘‘۔
لیفٹیننٹ گورنر نے کہا کہ پر امن یاترا سے دنیا میں جموں و کشمیر کے متعلق ایک اچھا پیغام عام ہوجاتا ہے ۔
قابل ذکر ہے کہ امسال۵۲دنوں پر محیط سالانہ شری امرناتھ جی یاترا۲۹جون سے شروع ہوگی۔
یاترا حسب روایت۴۸کلو میٹر طویل بنون پہلگام اور۱۴کلو میٹر طویل بالتل روٹس سے شروع ہوگی۔
سال گذشتہ زائد از ساڑھے چار لاکھ یاتریوں نے شری امر ناتھ جی یاترا کی تھی۔
دریں اثنا ایڈیشنل ڈائریکٹر جنرل آف پولیس جموں نے یاترا کے پیش نظر۲۷۰کلو میٹر طویل سرینگر جموں قومی شاہراہ کی سیکورٹی صورتحال کا جامع جائزہ لیا۔