پلوامہ/۸جون
جموں و کشمیر پولیس کے سربراہ آر آر سوائن نے ہفتہ کے روز کہا کہ پولیس اس سال ستمبر میں ہونے والے اسمبلی انتخابات کےلئے مرکز کے زیر انتظام علاقے میں جاری پرامن اور بے خوف ماحول کو برقرار رکھنے کے لئے اقدامات کر رہی ہے۔
ڈی جی پی نے پلوامہ میں عوامی شکایات کے ازالے کے نظام کے بارے میں نامہ نگاروں سے بات چیت کرتے ہوئے کہا کہ پولیس آئندہ اسمبلی انتخابات کےلئے جموں و کشمیر میں پرامن اور بے خوف ماحول کو برقرار رکھنے پر پوری طرح سے آگاہ ہے اور اس پر توجہ مرکوز کی گئی ہے۔
سوائن نے کہا کہ ہم امن اور بے خوف ماحول کی اہمیت کو جانتے ہیں۔ ”جب کوئی خوف نہیں ہوگا، تو لوگ ووٹ ڈالنے کے لئے ضرور نکلیں گے۔ اس لئے ہم اپنی توجہ مرکوز کر رہے ہیں اور آنے والے اسمبلی انتخابات کے لئے مرکز کے زیر انتظام علاقے میں موجود پرامن اور بے خوف ماحول کو برقرار رکھنے کے لئے اقدامات کر رہے ہیں“۔
پولیس سربراہ نے کہا کہ ہم لوک سبھا انتخابات میں رائے دہندگان کی بڑی تعداد کو جموں و کشمیر میں ایک اچھے سیکورٹی سائیکل کا محرک بنتے ہوئے دیکھنا پسند کریں گے۔
ایک سوال کے جواب میں ڈی جی پی نے اس بات کا اعادہ کیا کہ دہشت گردی میں مقامی سے غیر ملکی دہشت گردی میں تبدیلی آئی ہے۔ان کاکہنا تھا ”نوجوانوں کو بندوقوں سے دور رکھنے کی ہماری کوشش رنگ لے آئی ہے۔ اس نے بہت سی خواتین کو بیوہ ہونے سے بچایا ہے، بہت سے کنبوں کو برباد ہونے سے بچایا ہے اور بہت سی زندگیوں کو برباد ہونے سے بچایا ہے۔ لیکن غیر ملکی دہشت گرد موجود ہےں۔ تقریبا 70 سے 80 غیر ملکی دہشت گرد ہتھیاروں اور گولہ بارود کے ساتھ یہاں آئے ہیں۔ حال ہی میں، انہوں نے بجلی ٹاور کو دھماکے سے اڑانے کی کوشش کی، جو لوگوں کو بجلی فراہم کرتا ہے“۔
قبل ازیں عوامی دربار سے خطاب کرتے ہوئے سوائن نے کہا کہ پولیس اکثریت کو ریلیف فراہم کرنے کے لئے چند مجرموں کے خلاف سخت کارروائی کر رہی ہے جبکہ اس بات کو یقینی بنانے کی کوششیں جاری ہیں کہ پولیسنگ’سچائی اور انصاف‘ پر مبنی ہو۔
ڈی جی پی نے کہا کہ پولیس کو عوام کے لئے ہونا چاہئے اور ”ہماری کوشش ہے کہ لوگوں کے ساتھ مل کر کام کریں“۔ انہوں نے کہا”بعض اوقات، ہمیں اکثریت کو راحت فراہم کرنے کےلئے چند مجرموں یا ملزمین کے خلاف کارروائی کرنی پڑتی ہے“۔
سوائن نے کہا کہ کوئی کسر نہیں چھوڑی جا رہی ہے اور افسران کے درمیان باقاعدگی سے بات چیت ہوتی رہتی ہے تاکہ پولیسنگ کو سچائی اور انصاف کی بنیاد پر چلایا جا سکے۔ انہوں نے کہا کہ بعض اوقات کچھ خامیاں رہ سکتی ہیں یا کچھ غلطیاں ہو سکتی ہیں۔ انہوں نے کسی بھی واقعہ کا حوالہ دیئے بغیر کہا کہ پولیس کے ذریعہ کی گئی غلطیوں کو خود پولیس کو درست کرنا ہوگا۔
ڈی جی پی نے کہا کہ انتظامیہ / حکومت بدلتی رہتی ہے لیکن پولیس ایک ایسی فورس ہے جو ملک میں ہر جگہ نظر آتی ہے۔ انہوں نے کہا، ”لہذا پولیس ایک ایسی فورس ہے جو ہمیشہ لوگوں سے جڑی رہتی ہے۔“