ہمارا مقصد بی جے پی کو روکنا تھا، جسے ہم نے حاصل کیا: اے اے پی

نئی دہلی//دہلی میں لوک سبھا کی ایک بھی سیٹ جیتنے میں ناکام رہنے والی عام آدمی پارٹی (اے اے پی) نے بدھ کو کہا کہ اس نے گزشتہ عام انتخابات کے مقابلے میں بہت بہتر کارکردگی کا مظاہرہ کیا ہے نیز پنجاب اورچنڈی گڑھ میں مضبوط گرفت کے ساتھ بھارتیہ جنتا پارٹی (بی جے پی) کو اکثریت کی طرف بڑھنے سے روکنے کا ہدف کوحاصل کرنے میں کامیاب رہی ہے ۔
اے اے پی لیڈر سندیپ پاٹھک نے نامہ نگاروں سے کہا، "لوک سبھا انتخابات کے نتائج سے ملک کے لوگوں نے واضح کر دیا ہے کہ وہ کسی بھی طرح کی آمریت اور غنڈہ گردی کو برداشت نہیں کریں گے ۔
مسٹر پاٹھک نے کہا، "ایک طرف، بی جے پی نے اکثریت حاصل کرنے کی پوری کوشش کی، لیکن وہ اسے حاصل نہیں کر سکی۔ دوسری طرف انڈیا گروپ نے ایسے نامساعد حالات میں الیکشن لڑا اور بہت اچھی کارکردگی کا مظاہرہ کیا۔
اے اے پی لیڈر نے زور دے کر کہا کہ ان کے لیے پارٹی سے زیادہ ملک اہم ہے ۔ مسٹرپاٹھک نے کہا، ‘‘ہم نے مل کر اور طاقت کے ساتھ الیکشن لڑا۔ ہماری پارٹی مضبوط ہے اور ملک کے لیے لڑنے کے لیے پوری طرح تیار ہے ۔
انہوں نے کہا، ”عام آدمی پارٹی نے گزشتہ لوک سبھا انتخابات سے بہتر کارکردگی کا مظاہرہ کیا ہے ۔ اگر آپ لوک سبھا انتخابات کے نتائج کا اسمبلی انتخابات کے نتائج سے موازنہ کریں تو ہمیں کم ووٹ ملے ہیں، لیکن ہم اپنے مقاصد کو حاصل کرنے میں کامیاب رہے ہیں۔ ہمارا مقصد صرف بی جے پی کو روکنا تھا جسے ہم نے پوری طرح پورا کیا ہے ۔
اے اے پی لیڈر نے کہا، "ہم نے پنجاب اور چنڈی گڑھ میں بی جے پی کو روکا اور آنے والے وقت میں ہم مزید محنت کریں گے اور اچھے نتائج حاصل کریں گے ۔”
انہوں نے کہا کہ یہ الیکشن عام آدمی پارٹی کا نہیں تھا، انڈیا گروپ کا تھا۔ یہ ملک کی حالت بہتر کرنے کے لیے تھا۔ انہوں نے دعویٰ کیا کہ پارٹی کو کافی پریشانی کا سامنا کرنا پڑا ہے اور پارٹی لیڈروں اور کارکنوں کو بھی دھمکیوں کا سامنا کرنا پڑا ہے ۔
مسٹر پاٹھک نے پارٹی کارکنوں اور حامیوں کا شکریہ ادا کیا۔ انہوں نے کہا کہ ملک ہمارے لیے اہم ہے اور ہم نے ملک کو بچانے کے لیے لڑے ۔ ایسے نامساعد حالات کے باوجود ہمارے لیڈران، ساتھیوں اور کارکنوں نے جدوجہد کی۔ ہمیں انتخابات میں بہتر نتائج کی توقع تھی جو ہماری توقعات کے مطابق نہیں آئے لیکن ہم نے الیکشن میں بھرپور محنت کی اور عوام کی بھرپور محبت اور آشیرباد بھی ملا۔