کانگریس ٹی وی چینلوں پر ایگزٹ پول کی بحث میں حصہ نہ لینے کا اعلان

نئی دہلی//
کانگریس نے کہا ہے کہ لوک سبھا انتخابات کے لئے ووٹنگ کا آخری مرحلہ ہفتہ کو ہے اور اس کے بعد پارٹی ٹی آر پی کو بڑھانے کے لئے مختلف چینلوں کے ذریعہ نشر ہونے والے ایگزٹ پول مباحثوں میں حصہ نہیں لے گی۔
کانگریس کمیونیکیشن ڈپارٹمنٹ کے سربراہ پون کھیڑا نے آج یہاں جاری ایک بیان میں کہا کہ ملک کے ووٹروں نے اپنے حق رائے دہی کا استعمال کیا ہے اور نتائج ۴جون کو آنے والے ہیں۔ اس کے بارے میں ایگزٹ پول کی قیاس آرائیاں ہیں اور پارٹی اسے ٹی آر پی بڑھانے کے طریقے کے طور پر دیکھتی ہے ۔’’ پارٹی ان قیاس آرائیوں پر یقین نہیں رکھتی، اس لیے انتخابی نتائج سے متعلق ایگزٹ پول کی بحث میں حصہ نہیں لے گی‘‘۔
کھیڑا نے کہا’’رائے دہندگان نے اپنا ووٹ ڈال دیا ہے اور ان کا فیصلہ محفوظ ہو گیا ہے ۔ نتائج ۴جون کو آئیں گے ۔ اس سے پہلے ہمیں ٹی آر پی کے لیے قیاس آرائیوں اور کھینچ تان میں ملوث ہونے کی کوئی وجہ نظر نہیں آتی‘‘۔
کانگریسی ترجمان نے کہا’’کانگریس ایگزٹ پول پر بحث میں حصہ نہیں لے گی۔ کسی بھی بحث کا مقصد لوگوں کو معلومات دینا ہونا چاہیے ۔ ہم۴جون سے ہونے والی بحث میں خوشی سے حصہ لیں گے ‘‘۔
دریں اثناالیکشن کمیشن نے الیکٹرانک، پرنٹ اور دیگر تمام قسم کے ذرائع ابلاغ ا کو ہدایت دی ہے کہ وہ ہفتہ کو لوک سبھا انتخابات کے ساتویں اور آخری مرحلے کے اختتام کے بعد ہی ایگزٹ پول کی تشہیر کریں۔
۱۸ویں لوک سبھا کے انتخابات اور چار ریاستوں کے اسمبلی انتخابات کے سلسلے میں گزشتہ مارچ میں جاری کردہ نوٹیفکیشن کا حوالہ دیتے ہوئے کمیشن نے جمعہ کو کہا کہ۱۹؍اپریل کی صبح۷بجے سے یکم جون کی شام ساڈھے۶ بجے تک تمام میڈیا چینلز ور دیگر ذرائع ابلاغ پر رائے شماری کی اشاعت پر پابندی ہوگی۔
قابل ذکر ہے کہ لوک سبھا کے ساتویں اور آخری مرحلے اور اڈیشہ اسمبلی انتخابات کے آخری مرحلے کے لیے ہفتہ کو ووٹنگ ہونی ہے ۔ الیکشن کمیشن نے کہا ہے کہ ہفتہ کی شام ساڈھے ۶ بجے تک تمام قسم کے ایگزٹ پولس کی تشہیر پر پابندی رہے گی۔