جموں/30 مئی
جموں ضلع کے اکھنور کے چونگی موڑ علاقے میں جمعرات کی سہ پہر یاتریوں کو لے جانے والی ایک بس کے گہری کھائی میں گرنے سے کم از کم 21 افراد ہلاک اور 29 زخمی ہوگئے۔
ایک مقامی خبر رساں ایجنسی نے ایک عہدیدار کے حوالے سے کہا کہ بس اتر پردیش کے ہاتھرس سے ریاسی ضلع کے شیو کھوری علاقے جا رہی تھی جب اس میں حادثہ پیش آیا۔
عہدیدار نے بتایا کہ بس تقریبا 200 میٹر گہری کھائی میں گر گئی جس کے بعد ریسکیو آپریشن شروع کیا گیا اور زخمیوں کو اسپتال منتقل کیا گیا۔
بلاک میڈیکل آفیسر اکھنور محمد سلیم خان نے خبر رساں ایجنسی کو بتایا کہ 21 افراد کو مردہ حالت میں اسپتال لایا گیا اور 29 کے قریب زخمی ہوئے۔ انہوں نے کہا کہ شدید زخمیوں کو خصوصی علاج کے لئے جی ایم سی جموں ریفر کردیا گیا ہے۔
دریں اثنا صدر دروپدی مرمو نے اس واقعہ پر افسوس کا اظہار کیا ہے۔انہوں نے ایکس پر ایک پوسٹ میں کہا”جموں کے قریب اکھنور میں ایک بس حادثے میں جانوں کے ضیاع کے بارے میں جان کر بہت دکھ ہوا۔ سوگوار خاندانوں کے ساتھ میری گہری تعزیت ہے۔ میں زخمیوں کی جلد صحت یابی کی دعا کرتی ہوں“۔
جموں و کشمیر کے لیفٹیننٹ گورنر منوج سنہا نے اس واقعہ کو ‘دل دہلا دینے والا’ قرار دیا اور کہا کہ انتظامیہ ہر ممکن مدد فراہم کر رہی ہے۔
ان کاکہنا تھا”جموں کے اکھنور میں بس حادثہ دل دہلا دینے والا ہے۔ میں جانوں کے ضیاع پر تعزیت کرتا ہوں اور دعا کرتا ہوں کہ بھگوان سوگوار خاندانوں کو اس ناقابل تلافی نقصان کو برداشت کرنے کی توفیق عطا فرمائے۔ زخمیوں کی جلد صحت یابی کے لئے دعا گو ہوں۔ انتظامیہ سوگوار خاندانوں کو ہر ممکن مدد فراہم کر رہی ہے اور زخمیوں کو طبی سہولیات بھی فراہم کر رہی ہے“۔
