انتخابات کے دوران 8890 کروڑ روپے کی نقدی، منشیات اور دیگر سامان ضبط کیا گیا

نئی دہلی// الیکشن کمیشن نے ہفتہ کو کہا کہ لوک سبھا انتخابات کے لئے جاری انتخابی عمل کو مالیاتی لالچوں سے پاک رکھنے کی کوشش میں ملک بھر میں اب تک کل 8,890 کروڑ روپے کی نقدی اور دیگر سامان ضبط کیا گیا ہے ۔
کمیشن نے ایک پریس ریلیز میں کہا ہے کہ اس کی چوکسی کی وجہ سے کل 8889.74 کروڑ روپے ضبط کیے گئے ہیں جن میں 849.15 کروڑ روپے نقد، شراب، منشیات اور قیمتی دھاتیں اور تحفے کی اشیاء شامل ہیں۔
کمیشن نے کہا ہے کہ یہ ضبطی جلد ہی 9,000 کروڑ روپے سے اوپر پہنچ سکتی ہے ۔ پکڑی گئی کل اشیاء اور نقدی کا 45 فیصد مختلف نشہ آور ادویات کی شکم میں ہے ۔
کمیشن نے کہا ہے کہ اطلاعات پر مبنی مربوط کارروائی اور مسلسل چوکسی کی وجہ سے اس بار انتخابات کے دوران ضبط کی گئی نقدی اور دیگر سامان کی قیمت بے مثال ہے ۔
ریلیز کے مطابق سات مرحلوں والے لوک سبھا انتخابات کے دوران اب تک 814.85 کروڑ روپے کی 5,39,74,193.43 لیٹر شراب، 3958.85 کروڑ روپے کی منشیات، 1260.33 کروڑ روپے کی قیمتی دھاتیں اور 2006.56 کروڑ روپے کی اشیاء شامل ہیں۔
لوک سبھا انتخابات کے ساتھ ساتھ اروناچل پردیش، آندھرا پردیش، اڈیشہ اور سکم کی قانون ساز اسمبلی کے انتخابات بھی کرائے جا رہے ہیں۔ کمیشن کو موصول ہونے والی اطلاعات کے مطابق کرناٹک میں سب سے زیادہ 92 کروڑ روپے کی نقدی ضبط کی گئی ہے اور سب سے زیادہ 1.47 کروڑ لیٹر شراب کرناٹک میں ہی ضبط کی گئی ہے ۔