’انڈیا بلا ک کے لیڈر بزدل ہیں‘ جو پاکستان کے ایٹم بم سے خوفزدہ ہیں‘

سرینگر//(ویب ڈیسک)
وزیر اعظم نریندر مودی نے پیر کے روز حزب اختلاف کے اتحاد’انڈیا بلاک‘ کو تنقید کا نشانہ بناتے ہوئے اس کے رہنماؤں کو ’بزدل‘ قرار دیا جو ’پاکستان کی جوہری طاقت سے خوفزدہ‘ ہیں۔
بہار کے مظفر پور لوک سبھا حلقہ میں ایک انتخابی ریلی سے خطاب کرتے ہوئے وزیر اعظم مودی نے نیشنل کانفرنس کے رہنما فاروق عبداللہ کے حالیہ بیان کا بظاہر حوالہ دیا۔
مودی نے کہا کہ ایسا لگتا ہے کہ انڈیا بلاک میں ایسے رہنما موجود ہیں جو پاکستان سے خوفزدہ ہیں اور اس کی جوہری طاقت کے ڈراؤنے خواب دیکھ رہے ہیں۔
یہ تبصرہ فاروق عبداللہ کے اس بیان کے پس منظر میں سامنے آیا ہے جس میں انہوں نے کہا تھا کہ پاکستان کے پاس ایٹم بم ہیں اور اس نے چوڑیاں نہیں ہے۔
وزیر اعظم نے کہا کہ اگر پاکستان چوڑیاں نہیں پہنتا تو ہم ملک کو چوڑیاں پہنائیں گے۔ ’’میں جانتا تھا کہ ان کے پاس اناج نہیں ہے۔ اب مجھے پتہ چلا ہے کہ ان کے پاس چوڑیوں کی مناسب سپلائی بھی نہیں ہے‘‘۔
مودی کاکہنا تھا’’لیکن ہمیں اس اپوزیشن کو غور سے دیکھنا چاہیے جو بزدل اور ڈرپوک لوگوں سے بھری ہوئی نظر آتی ہے، جو دہشت گردی پر پاکستان کو کلین چٹ دیتے ہیں اور سرجیکل اسٹرائیک پر شکوک و شبہات کا اظہار کرتے ہیں۔ ان کے بائیں بازو کے اتحادی بھی چاہتے ہیں کہ ہمارے جوہری ہتھیاروں کو ختم کر دیا جائے‘‘۔
اس سے قبل حاجی پور لوک سبھا حلقہ میں ایک انتخابی ریلی سے خطاب کرتے ہوئے وزیر اعظم مودی نے کہا تھا کہ سیاست دانوں کے خلاف چھاپوں میں جو پیسہ برآمد ہوا ہے وہ ملک کے غریبوں کا ہے۔
مودی نے کہا’’میں آپ کو بتاؤں گا کہ وہ ای ڈی جیسی ایجنسیوں کی کارروائی کے خلاف کیوں رو رہے ہیں۔ پچھلی کانگریس حکومت کے دوران ای ڈی نے صرف ۳۵لاکھ روپے ضبط کیے تھے، جو اسکول بیگ میں رکھے جا سکتے تھے۔ جب سے ہم نے اقتدار سنبھالا ہے، ایجنسی نے ۲۲۰۰ کروڑ روپے کی وصولی کی ہے، جس کیلئے ۷۰ چھوٹے ٹرکوں کی ضرورت ہوگی‘‘۔
وزیر اعظم مودی نے کہا کہ اپنے مخالفین کے برعکس ، جو اپنی اولاد کو فروغ دینے کے بارے میں فکر مند ہیں ’’میرا کوئی وارث نہیں ہے۔ عام لوگ میرے وارث ہیں‘‘۔
مودی نے اس الزام کو دہرایا کہ کانگریس اور آر جے ڈی جیسی پارٹیاں جنہوں نے اقتدار میں رہتے ہوئے بھتہ خوری اور اغوا کو پھلنے پھولنے دیا تھا، اپنی ووٹ بینک کی سیاست کو آگے بڑھانے کے لئے مسلمانوں کو ریزرویشن دیں گی۔
مودی نے اپوزیشن جماعتوں پر ایودھیا میں رام مندر کے بارے میں نازیبا بیانات دے کر جان بوجھ کر لوگوں کے جذبات کو ٹھیس پہنچانے کا بھی الزام لگایا۔