تازہ برفباری:گریز ،بانڈی پورہ سڑک پر ٹریفک کی نقل و حمل بند

سرینگر//
شمالی کشمیر کے ضلع بانڈی پورہ میں راز دان پاس پر تازہ برف باری کے پیش نظر گریز، بانڈی پورہ سڑک پر ٹریفک کی نقل و حمل بند کر دی گئی ہے ۔
حکام نے بتایا کہ تازہ برف و باراں اور احتیاط کے طور پر گریز ،بانڈی پورہ روڈ پر اگلے احکامات تک ٹریفک کی نقل و حمل معطل کی جاتی ہے ۔
اطلاعات کے مطابق رازن پاس پر گذشتہ شام تازہ برف باری ہوئی ہے جس کے پیش نظر اس روڈ پر ٹریفک کو بند کر دیا گیا ہے ۔
وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر چھوٹی مسافر بر دار گاڑیوں کی نقل و حمل جاری ہے تاہم ناشری اور بانہال کے درمیان سڑک کی سطح ناموافق ہونے اور خانہ بدوشوں کے بھیڑ بکریوں کے جھنڈ کی نقل و حمل کے باعث ٹریفک کی رفتار سست ہے ۔
حکام نے ڈرائیوروں سے لین ڈسپلن پر عمل کرنے اور اوور ٹیکنگ سے گریز کرنے کی اپیل کی ہے ۔
ادھر جنوبی کشمیر کے ضلع شوپیاں کو صوبہ کشمیر کے پونچھ اور راجوری اضلاع کے ساتھ جوڑنے والے تاریخی مغل روڈ اور سرینگر، لیہہ شاہراہ پر ٹریفک مسلسل بند ہے ۔