ادھم پور تصادم :جنگلی علاقے میں تیسرے روز بھی تلاشی آپریشن جاری

جموں/۳۰؍اپریل
جموںکشمیر کے ادھم پور ضلع کے بسنت گڑھ جنگلی علاقے میں منگل کو تیسرے روز بھی ملی ٹینٹ مخالف آپریشن جاری رہا ۔
بتادیں کہ اتوار کی صبح بسنت گڑھ میں ملی ٹینٹوں کی فائرنگ میں ایک وی ڈی جی ممبر جاں بحق ہوا جس کے بعد سیکورٹی فورسز نے ایک وسیع العریض علاقے کو محاصرے میں لے رکھا ہے ۔
اطلاعات کے مطابق ادھم پور کے بسنت گڑھ جنگلی علاقے میں مسلسل تیسرے روز بھی دہشت گرد مخالف آپریشن جاری رہا۔
ذرائع نے بتایا کہ فوج ، ایس او جی ، سی آر پی ایف کے ساتھ ساتھ پیرا کمانڈوز نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔
ذرائع نے بتایا کہ پولیس اور فوج کے سینئر آفیسران آپریشن کی از خود نگرانی کررہے ہیں تاہم مفرور ملی ٹینٹوں کا ابھی تک کوئی سراغ نہیں مل پایا ہے ۔
اے ڈی جی پی جموں آنند جین کا کہنا ہے کہ جنگلی علاقے میں چار سے چھ ملی ٹینٹ موجودہوسکتے ہیں۔
ان کے مطابق دہشت گرددراندازی کے ذریعے اس طرف آنے میں کامیاب ہوئے ہیں جنہیں بڑے پیمانے پر تلاش کیا جارہا ہے ۔انہوں نے مزید بتایا کہ مفرور ملی ٹینٹوں کو بہت جلد انجام تک پہنچایا جائے گا۔
واضح رہے کہ ملی ٹینٹوں کی نقل وحرکت کی اطلاع موصول ہونے کے بعد وی ڈی جی ممبران نے اتوار کی صبح ادھم پور کے بسنت گڑھ جنگلی علاقے میں تلاشی آپریشن شروع کیا جس دوران تاک میں بیٹھے بندو ق برداروں نے اندھا دھند فائرنگ شروع کی جس کے نتیجے میں ایک وی ڈی جی ممبر جاں بحق ہوا ۔
اس دوران ایڈیشنل ڈائریکٹر جنرل آف پولیس جموں آنند جین نے منگل کے روز بسنت گڑھ ادھم پور کا دورہ کیا اور وہاں پر ضلع بھر کی سیکورٹی صورتحال کا جائزہ لیا۔
معلوم ہوا ہے کہ اس موقع پر وی ڈی جی ممبران اے ڈی جی پی کے ساتھ ملاقات کی اور دہشت گردوں سے نبرد آزما ہونے کی خاطر جدید اسلحہ فراہم کرنے کا مطالبہ کیا۔
اطلاعات کے مطابق منگل کے روز اے ڈی جی پی جموں رینج آنند جین نے بسنت گڑھ ادھم پور کا دورہ کیا اور وہاں پر جاری آپریشن کے بارے میں آگاہی حاصل کی۔
ذرائع نے بتایا کہ اے ڈی جی پی کے ہمراہ پولیس اور فوج کے سینئر آفیسران بھی ساتھ تھے ۔
ذرائع کے مطابق ادھم پور میں اے ڈی جی پی نے ایک اعلیٰ سطحی میٹنگ کی صدارت کی جس دوران انہیں بسنت گڑھ کے جنگلی علاقے میں جاری آپریشن کے بارے میں بریف کیا گیا۔
ذرائع نے بتایا کہ اے ڈی جی پی نے آفیسران کو ہدایت دی کہ دراندازی کے ذریعے اس طرف آنے والے ملی ٹینٹوں کو جلدازجلد انجام تک پہنچایا جائے ۔
ذرائع کا کہنا ہے کہ ملی ٹینٹوں کی مدد و اعانت اور لاجسٹک سپورٹ فراہم کرنے والوں کو بھی جلدازجلد سلاخوں کے پیچھے دھکیلنے کی ہدایت دی گئی۔
دریں اثنا وی ڈی جی ممبران کے ایک وفد نے ایڈیشنل ڈائریکٹر جنرل آنند جین سے ملاقات کے دوران کئی اہم مسائل ابھارے ۔
وی ڈی جی ممبران نے دہشت گردوں سے نبرد آزما ہونے کی خاطر اے ڈی جی پی سے جدید اسلحہ فراہم کرنے کی مانگ دہرائی۔