اننت ناگ راجوری لوک سبھا الیکشن الیکشن کیلئے سکیورٹی انتظامات کا جائزہ

اننت ناگ//
جموں کشمیر کے ڈائرکٹر جنرل آف پولیس (ڈی جی پی)‘ آر آر سوائن نے آج جنوبی کشمیر کے ضلع اننت ناگ میں منعقدہ ایک مشترکہ افسران کے اجلاس میں آئندہ لوک سبھا انتخابات کے لئے سیکورٹی تیاریوں کا جائزہ لیا۔
پولیس کے ایک ترجمان کے مطابق اجلاس کا مقصد انتخابات کے لئے تعینات فورسز کی تیاریوں کا جائزہ لینا اور آئندہ انتخابات کے محفوظ اور کامیاب انعقاد کو یقینی بنانے کے لئے مشترکہ کوششوں میں سہولت فراہم کرنا تھا۔
میٹنگ کے دوران ڈی جی پی نے جموں و کشمیر پولیس ، سی آر پی ایف ، فوج ، آئی ٹی بی پی ، بی ایس ایف ، ایس ایس بی اور انٹیلی جنس ایجنسیوں کے سینئر افسران کے ساتھ تفصیلی تبادلہ خیال کیا۔
ڈی جی پی نے اجلاس سے خطاب کرتے ہوئے شرکاء پر زور دیا کہ وہ امیدواروں اور پولنگ بوتھوں کی حفاظت کے لئے ایکشن پلان پر سختی سے عمل درآمد کریں۔ انہوں نے کہا کہ علاقوں کی حساسیت کو مدنظر رکھتے ہوئے پولنگ بوتھوں کی سکیورٹی کے انتظامات موثر انداز میں کئے جائیں۔
اجلاس میں تمام قوتوں کی جانب سے جمہوری اقدار اور اصولوں کو برقرار رکھنے اور انتخابی عمل کے تقدس کو برقرار رکھنے کے عزم کا اعادہ کیا گیا۔
اجلاس میں انتخابات کے پرامن انعقاد کے لیے کیے گئے سکیورٹی انتظامات پر توجہ مرکوز کی گئی۔ ڈی جی پی نے محفوظ انتخابات کو یقینی بنانے کیلئے منصوبہ بند مختلف منصوبوں کے بارے میں افسران سے رائے طلب کی۔
اجلاس کے دوران اہم تبادلہ خیال کے نکات انتخابی تیاریوں، عمل سے متعلق تمام لاجسٹک اور انتظامی پہلوؤں کو حل کرنے، فورسز کے ساتھ ہموار ہم آہنگی کی سہولت فراہم کرنے، انتخابی عمل کے سامنے آنے والے کسی بھی چیلنج یا خدشات سے نمٹنے پر مرکوز تھے۔
اجلاس کے دوران مختلف علاقوں میں تعینات اہلکاروں اور ان کی نقل و حرکت‘ صحت کی دیکھ بھال‘ ہیٹنگ اور موسمی ضروریات کے مطابق دیگر ضروری سہولیات کے حوالے سے انتظامات پر بھی تبادلہ خیال کیا گیا۔
اجلاس کے دوران سی اے پی ایف، پولیس اور فوج کی جانب سے انتخابات سے قبل اور اس کے دوران مشترکہ علاقوں پر غلبہ حاصل کرنے کی اشد ضرورت پر زور دیا گیا۔
آپریشنل کارکردگی اور کوآرڈینیشن کی اعلیٰ سطح کو یقینی بنانے کے لئے افسران نے کلیدی اہلکاروں اور کوئے کمانڈرز کو بریفنگ دینے، ان کے متعلقہ کردار اور ذمہ داریوں کی نشاندہی کرنے اور بدلتے ہوئے سکیورٹی منظرنامے پر ریئل ٹائم اپ ڈیٹس فراہم کرنے پر بھی توجہ مرکوز کی۔