بجبہاڑہ میں ’دہشت گردوں‘ کی فائرنگ میں بہار کا رہائشی ہلاک

سرینگر//
جنوبی کشمیر کے اننت ناگ ضلع کے بجبہاڑہ علاقے میں بدھ کی شام دہشت گردوں نے بہار کے ایک باشندے کو گولی مار کر ہلاک کر دیا۔
پولیس کے ایک ترجمان نے بتایا کہ دہشت گردوں نے بجبہاڑہ کے جبلی پورہ علاقے میں بہار کے رہائشی راجو شاہ کو گولی مار کر شدید زخمی کر دیا۔
پولیس کے ایک ترجمان نے آج رات ’ایکس‘ پر کہا’’اننت ناگ کے جبلی پورہ بجبہاڑہ میں دہشت گردوں نے بہار کے رہنے والے راجو شاہ پر فائرنگ کر کے اسے شدید زخمی کر دیا۔ انہیں علاج کے لئے اسپتال منتقل کر دیا گیا ہے۔ علاقے کو محاصرے میں لیا گیا ہے ۔ مزید تفصیلات سامنے آئیں گی‘‘۔
اس دوران ایک مقامی خبر رساں ایجنسی ‘جی این ایس نے حکام کے حوالے سے خبر دی ہے کہ دہشت گردوں کی جانب سے انتہائی قریب سے فائرنگ کے نتیجے میں یہ شخص زخموں کی تاب نہ لاتے ہوئے دم توڑ گیا۔
ادھر جنوبی کشمیر کے ضلع اننت ناگ میں فوج نے پولیس کے ساتھ مل کر دو افراد کو اسلحہ اور گولہ بارود کے ساتھ گرفتار کیا ہے۔
فوج نے کہا کہ ایک خفیہ اطلاع پر کارروائی کرتے ہوئے ہندوستانی فوج اور پولیس نے اننت ناگ کے بجبہاڑہ میں ایک مشترکہ آپریشن شروع کیا تھا ، جس کے بعد انہوں نے کہا کہ دو مشتبہ افراد کو اسلحہ ، دستی بم اور دیگر گولہ بارود کے ساتھ گرفتار کیا گیا ہے۔
ملک کے دوسرے حصوں کی طرح جموں کشمیر میں بھی پہلے مرحلے کے تحت جمعہ ۱۹؍اپریل کو ووٹ ڈالے جائیں گے جس کیلئے کشمیر او جموں کے سبھی اضلاع میں سکیورٹی کے سخت انتظامات کئے گئے ہیں ۔