ڈنمارک کی تاریخی عمارت میں خوفناک آتشزدگی

کوپن ہیگن//
ڈنمارک کے دارالحکومت کوپن ہیگن میں اسٹاک ایکسچینج کی مشہور اور تاریخی عمارت میں خوفناک آتشزدگی کا واقعہ پیش آیا ہے۔
غیر ملکی خبر رساں ادارے کی رپورٹ کے مطابق لگنے والی آگ کے بلند و بالا شعلوں نے کوپن ہیگن کے سابق اسٹاک ایکسچینج کی تاریخی عمارت ’بورسن‘ کو اپنی لپیٹ میں لے لیا، جو ڈنمارک کے دارالحکومت کی 17ویں صدی کی تاریخی، قدیم ترین اور مشہور عمارتوں میں سے ایک ہے۔
بورسن نامی اس تاریخی عمارت کی تزئین و آرائش کاکام جاری تھا کہ اچانک آگ بھڑک اٹھی، تاہم کسی جانی نقصان کی اطلاع نہیں ملی ہے۔ ابتدائی اطلاعات تک آگ لگنے کی اصل وجہ واضح نہیں ہو سکی۔
اس حوالے سے ڈنمارک کے وزیر ثقافت جیکب اینجل شمٹ نے حادثے کو قومی آفت قرار دیتے ہوئے کہا کہ یہ دیکھنا قابل رشک تھا کہ لوگوں نے جلتی ہوئی عمارت سے آرٹ کے خزانے اور مشہور تصاویر کو بچانے کیلئے اپنا بھرپور کردار ادا کیا ہم بہت کچھ بچانے میں کامیاب رہے ہیں۔