’انڈیا بلاک سی اے اے پر افواہیں پھیلا رہاہے ‘

کوچ بہار/
وزیر اعظم نریندر مودی نے شہریت ترمیمی قانون (سی اے اے) کے بارے میں افواہیں پھیلانے کے لیے اپوزیشن بلاک انڈیا کو تنقید کا نشانہ بناتے ہوئے کہا’’ماں بھارتی (مدر انڈیا) پر بھروسہ رکھنے والوں کو شہریت فراہم کرنا مودی کی گارنٹی ہے‘‘۔
مغربی بنگال کے کوچ بہار کے رش میلہ میدان میں ایک بڑی ریلی سے خطاب کرتے ہوئے مودی نے بدعنوانوں کو بچانے کی کوشش کیلئے اپوزیشن پارٹیوں کو تنقید کا نشانہ بنایا اور کہا کہ وہ اس بات کو یقینی بنائیں گے کہ انہیں سزا دی جائے۔
مودی نے کہا’’انہوں (انڈیا بلاک) نے کبھی بھی پسماندہ طبقات کی پروا نہیں کی۔ اب جب ہم سی اے اے لائے ہیں تو وہ افواہیں اور جھوٹ پھیلا رہے ہیں۔ یہ مودی کی گارنٹی ہے کہ جن لوگوں کو ماں بھارتی پر بھروسہ ہے انہیں شہریت فراہم کی جائے‘‘۔
اپوزیشن اتحاد انڈیا پر تنقید کرتے ہوئے مودی نے کہا کہ اپوزیشن اتحاد جھوٹ اور دھوکہ دہی کی سیاست میں مصروف ہے۔مودی کہنا تھا’’میں کہہ رہا ہوں کہ بدعنوانی کو ختم کرو۔ اپوزیشن کہہ رہی ہے کہ بدعنوانوں کو بچائیں۔ میں اس بات کو یقینی بناؤں گا کہ بدعنوانوں کو سزا دی جائے اور غریبوں کو انصاف ملے۔ اگلے پانچ سالوں میں بدعنوان وں کے خلاف مزید سخت کارروائی کی جائے گی‘‘۔
اس سے پہلے بہار کے جموئی میں ایک انتخابی ریلی سے خطاب میںوزیر اعظم نریندر مودی نے ملک کی بدنامی کے لئے کانگریس کو تنقید کا نشانہ بنایا اور وزیر اعلیٰ نتیش کمار کی تعریف کی۔
مودی نے پاکستان کا نام لینے سے گریز کیا لیکن کہا کہ بی جے پی زیرقیادت این ڈی اے حکومت کے تحت ہندوستان نے مگدھ سلطنت کی قدیم عظمت کو بحال کرتے ہوئے جوابی حملہ کرنا شروع کردیا ہے۔
وزیر اعظم نے عام آدمی پارٹی پر بھی بالواسطہ طنز کیا جس نے دہلی میں کانگریس کے ساتھ اتحاد کیا ہے۔
مودی نے کہا’’یہ سبھی لوگ جو ایک دوسرے پر بدعنوانی کا الزام لگاتے تھے، اب مودی کو گالیاں دینے کے لیے اکٹھے ہو گئے ہیں‘‘۔
وزیر اعظم نے دعویٰ کیا کہ جب کانگریس اقتدار میں تھی تو گندم کی سپلائی کیلئے جدوجہد کرنے والے چھوٹے ممالک کے دہشت گرد اپنی مرضی سے حملہ کرسکتے تھے۔انہوں نے ’روزگار کے لئے زمین گھوٹالہ‘کا ذکر کیا جس میں آر جے ڈی صدر لالو پرساد یادو کو ملزم کے طور پر نامزد کیا گیا ہے۔’’ ہمارے حلیف نتیش بابو (بہار کے وزیر اعلی) بھی ریلوے کے وزیر تھے۔ وزیر اعظم نے کہا کہ ان کا کتنا بے داغ ریکارڈ تھا‘‘۔
مودی نے لوک سبھا انتخابات کے اعلان کے بعد بہار میں اپنے پہلے جلسہ عام سے خطاب کرتے ہوئے آر جے ڈی-کانگریس اتحاد پر ایودھیا میں رام مندر کی بے عزتی کرنے اور ایک آدیواسی خاتون (دروپدی مرمو) کے ملک کے صدر منتخب ہونے کی مخالفت کرنے کا بھی الزام لگایا۔
وزیر اعظم نے کہا کہ ایسا لگتا ہے کہ بہار کے لوگوں نے این ڈی اے کو ریاست کی تمام۴۰سیٹیں جیتنے اور ملک میں ۴۰۰ سے زیادہ سیٹیں حاصل کرنے میں مدد کرنے کا فیصلہ کیا ہے۔ (ایجنسیاں)