لو جی اب ہم سمجھ گئے کہ امسال چلہ کلان کا اصل مسئلہ کیا ہے… دیر سے ہی سہی‘ چلہ کلان کے جاتے جاتے ہماری اس نا سمجھ ‘ سمجھ میں یہ بات آگئی کہ … کہ آخر ماجرا کیا ہے… ہم نادان چلہ کلان کی آمد کے ساتھ ہی وادی میں برفباری اور بارشوں کی توقع اور آس لگائے بیٹھے تھے… لیکن… لیکن ایسا نہیں ہوا … اور اس لئے نہیں ہوا کیونکہ چلہ کلان کشمیر میں تھا ہی نہیں… جب چلہ کلان کشمیر میں تھا ہی نہیں تو … تو پھر بارشیں کیا اور برفباری کیا ۔ تو صاحب اب سوال یہ ہے کہ…چلہ کلان کہاں گیا ؟اگر یہ کشمیر میں نہیں تھا تو… تو پھر کہاں تھا یا کہاں ہے…اللہ میاں کے فضل و کرم سے یہ گتھی سلجھ گئی ہے … اور کہنے والوں کاکہنا ہے کہ یقینا چلہ کلان اپنی آمد کے ساتھ ہی کشمیر وارد ہواتھا… لیکن وارد ہونے کے ایک آدھ دنوں بعد ہی یہ یہاں سے چلا گیا… کہاں چلا گیا؟ کہنے والوں کاکہنا ہے کہ جموں چلا گیا اور… اورو ہ دن اور آج کا دن اس کے بعد اس نے کشمیر کی طرف آنکھ اٹھا کے دیکھا بھی نہیں یہاں آنے کی تو بات ہی نہیں … چلہ کلان جموں میں ہی براجمان رہا اور… اور اپنی مدت مکمل کرنے کے بعد یہ جموں سے ہی رخصت ہو جائیگا … اگر … ایسا نہیں ہوتا تو… تو جموں میں اتنی ٹھنڈ نہیں ہوتی جتنی ہے… نہ صرف رات بلکہ دن کا درجہ حرارت بھی کم ہے… معمول سے کم۔ اور… اور بدھ کو جموں میں دن کا درجہ حرارت معمول سے دس ڈگری کم تھا… اب سوال یہ ہے کہ چلہ کلان نے کشمیر سے منہ پھیر کر جموں رخ کیوں کیا … کیا اس کا کشمیر سے اب جی بھر گیا ہے یا … یا پھر اسے اب کشمیریوں کی مہمان نوازی پسند نہیں ہے تو… تو صاحب کہنے والوں کاکہنا ہے کہ ایسا ویسا کچھ بھی نہیں ہے… بلکہ چلہ کلان کے جموں میں براجمان ہونے کی ایک ہی وجہ ہے اور… اور یہ ہے کہ چلہ کلان ان کشمیریوں کو اپنی کمی محسوس نہیں ہونے دینا چاہتا تھا جو … جو چلہ کلان سے پہلے ہی کشمیر سے نو دو گیا ہو کر جموں میں پناہ لیتے ہیں… چلہ کلان ان کو سبق سکھانا چاہتا تھا کہ در بار مو کی روایت ختم ہونے کے بعد بھی انہوں نے جموں جانے کی روایت برقرار کیوں رکھی کہ… کہ یقینا کچھ لوگ مجبوراً جموں جاتے ہیں… لیکن اکثریت عادتاً۔ ہے نا؟