سرینگر//
سیکورٹی فورسز نے بدھ کے روزشمالی ضلع کپواڑہ کے چوکی بل علاقے میں آئی ای ڈی برآمد کی جس کو بعد میں ناکارہ بنا دیا گیا۔
دفاعی ترجمان نے ایکس پر جانکاری فراہم کرتے ہوئے بتایا کہ فوج نے چوکی بل کپواڑہ میں بدھ کے روز ایک آئی ای ڈی برآمد کی۔
ترجمان نے بتایا کہ آئی ای ڈی کی برآمد گی کے بعد بم ناکارہ بنانے والی ایک ٹیم کو جائے موقع پر طلب کیا گیا جس نے اس بارودی شئے کو بغیر کوئی نقصان پہنچائے ناکارہ بنا دیا۔
ترجمان کے مطابق فوج نے دہشت گردوں کے ایک بڑے منصوبے کو ناکام بنا دیاہے۔معلوم ہوا ہے کہ چوکی بل میں آئی ای ڈی برآمدگی کے بعد شمالی ضلع کپواڑہ میں فوج کو مستعد رہنے کے احکامات صادر کئے گئے ہیں۔
ذرائع نے بتایا کہ یوم جمہوریہ کے پیش نظر کشمیر کے سبھی اضلاع میں فوج کی چوکسی بڑھائی گئی ہے جبکہ خصوصی ناکہ چیکنگ کے دوران گاڑیوں اور مسافروں کی باریک بینی سے تلاشی لی جارہی ہے۔
دریں اثنا پولیس نے معاملے کی نسبت کیس درج کرکے تحقیقات شروع کی ہے۔