دوشیزہ پر حملہ: ایک ہی خاندان کے چھ افراد گرفتار

سرینگر//
جموں وکشمیر کے وسطی ضلع بڈگام کے بونہ مکہامہ ماگام علاقے میں نو عمر لڑکی پر حملہ کرنے کی پادائش میں چھ افراد کو حراست میں لے لیا گیا ہے ۔
پولیس کے ایک ترجمان نے بتایا کہ منگل کے روز بڈگام کے بونہ مکہامہ ماگام علاقے میں سڑک کی تعمیر کے تنازعے پر دو گروہوں کے درمیان جھگڑا شروع ہوا جس دوران عبدالخالق پرے ولد غلام محمد پرے ، محمد رمضان پرے ولد غلام محمد پرے اور بشیر احمد پرے ولد محمد مقبول پرے اور اُن کے اہل خانہ نے عبدالرشید پرے ساکن بونہ مکہامہ کے گھر اور اہل خانہ پر حملہ کیا۔
ترجمان نے بتایا کہ اس واقعے میں عبدالرشید پرے کی دختر جس کی عمر۱۶سے۱۷سال کے درمیان ہے کے سر پر تیز دھار والے ہتھیار وار کیا گیا جس کے نتیجے میں وہ شدید طورپر زخمی ہوئی اورا س کو علاج ومعالجہ کی خاطر صدر ہسپتال منتقل کیا گیا جہاں پر اُس کی حالت تشویشناک بنی ہوئی ہے ۔
پولیس ترجمان کے مطابق اس ضمن میں ایف آئی آر زیر نمبر۲۰۲۲/۶۴کے تحت کیس درج کرکے ابھی تک چھ ملزمان کو گرفتار کیا گیا ہے ۔
ترجمان نے بتایا کہ تفتیش جاری ہے اور مزید گرفتاریوں کو خارج از امکان قرار نہیں دیا جاسکتا ۔