تریپورہ میں کھوائی-ہرینا قومی شاہراہ کو دو لین بنانے کی منظوری

نئی دہلی// شمالی اور جنوبی تریپورہ کے درمیان نقل وحمل کو آسان اور بہتر بنانے کے لئے حکومت نے کھوائی سے ہرینا کے درمیان قومی شاہراہ کو دو لین تک چوڑا کرنے کی منظوری دی ہے ۔
وزیر اعظم نریندر مودی کی صدارت میں بدھ کو یہاں اقتصادی امور کی کابینہ کمیٹی کی میٹنگ میں اس سلسلے میں فیصلہ کیا گیا۔
اطلاعات و نشریات کے وزیر انوراگ ٹھاکر نے میٹنگ کے بعد پریس کانفرنس سے خطاب کرتے ہوئے کہا کہ اس پروجیکٹ کی کل لاگت کا تخمینہ 2487 کروڑ روپے ہے اور یہ پروجیکٹ دو سال میں مکمل ہونا ہے ۔
پروجیکٹ پر کام کی تکمیل کے ساتھ ہی شمالی اور جنوبی تریپورہ کے درمیان رابطے میں بہتری آئے گی۔ سڑک کی تعمیر سے ریاست کے شمالی اور جنوبی حصوں کے درمیان فاصلے بھی کم ہوں گے ۔ اس منصوبے پر کام مکمل ہونے کے بعد کھوائی اور ہرینا کے درمیان فاصلہ 28 کلومیٹر کم ہو جائے گا اور گاڑیاں پانچ گھنٹے کی بجائے محض ڈھائی گھنٹے میں اپنی منزل تک پہنچ سکیں گی۔
مرکزی وزیر نے کہا کہ اس راستے پر پہلے گاڑیاں 30 کلومیٹر فی گھنٹہ کی رفتار سے چلتی تھیں لیکن سڑک کی تعمیر کا کام مکمل ہونے کے بعد گاڑیاں 60 کلومیٹر فی گھنٹہ کی رفتار سے چل سکیں گی۔ یہ سڑک بنگلہ دیش کی سرحد کے قریب ہے جس سے کیلاشہر، کمال پور اور کھوائی سرحدی چیک پوسٹوں کے ذریعے بنگلہ دیش کے ساتھ رابطے میں بھی بہتری آئے گی۔