سانبہ :موٹار شیل پھٹنے سے نوجوان جاں بحق‘ساتھی زخمی

جموں//
جموںکشمیر کے سانبہ ضلع میں موٹار شیل پھٹنے سے مقامی نوجوان کی برسر موقع ہی موت واقع ہوئی ہے۔
اطلاعات کے مطابق جموں کے سانبہ ضلع کے جنگلی علاقے میں دو نوجوانوں نے بارودی شیل کے ساتھ چھیڑ چھاڑ کی جس دوران زور دار دھماکہ ہوا جس کے نتیجے میں دونوں شدید طورپر زخمی ہوئے۔
معلوم ہوا ہے کہ دھماکے کی آوازسنتے ہی آس پاس رہائش پذیر لوگ فوری طورپر جائے موقع پر پہنچے اور زخمیوں کو طبی امداد کی خاطر نزدیکی ہسپتال منتقل کیا تاہم وہاں پر تعینات ڈاکٹروں نے نوجوان کو مردہ قرار دیا۔
متوفی کی شناخت۱۹سالہ پون سنگھ ولد کلدیپ سنگھ کے بطور ہوئی ہے جبکہ زخمی کی پہچان روشن سنگھ ولد کاکا سنگھ کے بطور کی گئی ہے۔
دریں اثنا پولیس نے اس سلسلے میں کیس درج کرکے تحقیقات شروع کی ہے۔