بمنہ اور صنعت نگر کے فلائی اوورز کو سال نو کے وسط تک مکمل ہوں گے :بدھوری

سرینگر//
صوبائی کمشنر کشمیر‘ وجے کمار بدھوری کا کہنا ہے کہ سرینگر کے بمنہ اور صنعت نگر علاقوں میں تیار ہو رہے فلائی اوورز کو سال نو کے وسط تک عوام کے نام وقف کیا جائے گا۔
بدھوری نے کہا کہ تمام فلائی اوورز پر کام تیزی سے جاری ہے اور ہم چاہتے ہیں کہ چلہ کلاں سے پہلے کام میں زیادہ سرعت لائی جائے ۔
صوبائی کمشنر نے ان باتوں کا اظہار بدھ کے روز یہاں میڈیا کے ساتھ بات کرنے کے دوران کیا۔
بدھوری نے کہا’’بوٹینگو کراسنگ پر جو فلائی اوور بن رہا ہے وہ ہمارے لئے سب سے اہم ہے اس پر تیزی سے کام چل رہا ہے‘‘۔ان کا کہنا تھا کہ اس فلائی اورر کی تکمیل کیلئے۱۵نومبر کی ڈیڈ لائن دی گئی تھی لیکن وہ کچھ مسائل کی وجہ سے پوری نہیں ہوسکی۔
صوبائی کمشنر نے کہا کہ بمنہ فلائی اوور پر کام تیزی سے چل رہا ہے اور ہم چاہتے ہیں کہ چلہ کلاں سے پہلے فلائی اوورز پر چل رہے کام میں مزید سرعت آئے ۔انہوں نے کہا کہ بمنہ اور صنعت نگر فلائی اوورز کو سال نو کے وسط تک عوام کے نام وقف کیا جائے گا۔
بدھوری کا کہنا تھا کہ جتنے بھی چیک پوائنٹس ہیں ان پر دھیان رکھا جا رہا ہے اور قومی شاہراہ پر بھی دو طرفہ ٹریفک کی نقل و حمل بغیر کسی رکاوٹ کے جاری ہے ۔
صوبائی کمشنرکاکہنا تھا کہ واٹر ٹرانسپورٹ سرینگر اسمارٹ سٹی لمیٹڈ (ایس ایس سی ایل) کا ایک فلیگ شپ پروجیکٹ ہے جس کا مقصد سرینگر شہر میں پانی پر مبنی پبلک ٹرانسپورٹ سسٹم کو بحال کرنا ہے۔
بدھوری نے نقل و حمل کے ایک اضافی ذریعہ کے طور پر آبی نقل و حمل کے نظام کی ضرورت پر زور دیا۔
کشمیر کے ڈویڑنل کمشنر نے راستوں اور کرایوں کے ڈھانچے کو حتمی شکل دینے اور ٹینڈر جلد طلب کرنے کی بھی ہدایت کی۔انہوں نے کہا کہ واٹر ٹرانسپورٹ آبی ذخائر میں رونق لائے گی اور مقامی افراد اور سیاحوں کے لئے نئی کشش بن جائے گی۔