جموں//
جموںکشمیر کے ضلع کٹھوعہ میں بدھ کے روز سڑک حادثے میں سکوٹی سوار کی موت واقع ہوئی۔
ذرائع نے بتایا کہ کٹھوعہ میں بدھ کے روز ایک بس اور ایک سکوٹی کے درمیان زور دار ٹکر ہوئی جس کے نتیجے میں سکوٹی سوار کی بر سر موقع ہی موت واقع ہوئی۔
وہاں موجود لوگوں نے سکوٹی سوار کی لاش کو ہسپتال منتقل کیا۔ان کا کہنا تھا کہ متوفی، جس کی شناخت ابھی معلوم نہیں ہوئی ہے ، کے بیٹے کو حادثے کے متعلق مطلع کیا گیا ہے ۔
دریں اثنا پولیس نے جائے موقع پر پہنچ کر اس سلسلے میں ایک کیس درج کرکے کارروائی شروع کی ہے ۔
یہاں پر یہ بات قابل ذکر ہے کہ جموں وکشمیر کی سڑکوں پر موت کا رقص تواتر کے ساتھ جاری ہے ۔آئے روز کسی نہ کسی علاقے میں سڑک حادثوں کی وجہ سے اموات واقع ہونے سے ماتم کا ماحول چھا جاتا ہے ۔لوگوں کا کہنا ہے کہ خستہ سڑکوں کے ساتھ ساتھ ٹریفک قوانین کی خلاف ورزی ان حادثات کی بنیادی وجہ ہے ۔
