وجے گوئل نے ایوان میں سوالات کی آڑ میں اپوزیشن کے ذریعے الزامات لگانے کی چیئرمین سے شکایت کی

نئی دہلی// راجیہ سبھا میں حکمراں جماعت کے لیڈر اور و صنعت تجارت کے وزیر پیوش گوئل نے جمعہ کو شکایت کی کہ اپوزیشن کے کچھ اراکین نے حکومت پر بے بنیاد الزامات لگانے کے لیے وقفہ سوالات کا استعمال کیا ہے ۔ انہوں نے اس رجحان کے خلاف کچھ رولنگ د یئے جانے کی صدر نشیں سے درخواست کی۔
ایوان میں موجود ریلوے وزیر اشونی ویشنو نے بھی اس مسئلے پر ایوان میں مسٹر گوئل کی طرف سے اٹھائے گئے ان کی تجویز کی حمایت کی۔
وقفہ سوالات کے دوران خوراک، امور صارفین، خوراک اور عوامی تقسیم کے محکمے سے متعلق ضمنی سوالات کا جواب دیتے ہوئے ،مسٹر گوئل نے چیئرمین جگدیپ دھنکڑ سے شکایت کی کہ کچھ اراکین وقفہ سوالات کی آڑ میں حکومت پر الزامات لگاتے ہیں۔ انہوں نے چیئرمین پر زور دیا کہ بے بنیاد سوالات اٹھا کر حکومت پر الزامات لگانے کا یہ طریقہ درست نہیں ہے ۔ اس رجحان کے خلاف کچھ رولنگ دیئے جانے کی ضرورت ہے ۔
قبل ازیں ان سے پبلک ڈسٹری بیوشن سسٹم کے تحت مرکز کی طرف سے جاری کردہ اناج کے کچھ ریاستوں کی جانب سے مسترد کیے جانے کے بارے میں پوچھا گیا تھا۔ اس طرح کے واقعہ کی واضح طور پر تردید کرتے ہوئے مسٹر گوئل نے کہا ‘فوڈ کارپوریشن آف انڈیا (ایف سی آئی ) کی طرف سے ریاستوں کو جاری کردہ اناج کی کسی بھی کھیپ کی واپسی کا ایک بھی معاملہ سامنے نہیں آیا ہے ۔’
گلوبل ہنگر انڈیکس (جی ایچ آئی) میں 135 ممالک میں ہندوستان کے 111 ویں مقام ہونے کے بارے میں پوچھے گئے ایک دیگر ضمنی سوال کے جواب میں مسٹر گوئل نے کہا کہ حکومت ہند نے گلوبل ہنگر انڈیکس کے مسائل کو مسترد کر دیا ہے ۔ انہوں نے کہا کہ اس رپورٹ کو تیار کرنے والی مغربی ایجنسی کچھ معیارات اپناتی ہے جیسے ‘اسٹنٹنگ’ (کم جسمانی نشوونما) جو مغربی ممالک کے لیے موزوں تو ہو سکتے ہیں لیکن ہندوستان کی آبادیاتی خصوصیات سے میل نہیں کھاتے ۔