نئی دہلی// صدر جمہوریہ دروپدی مرمو نے مرکزی وزراء نریندر سنگھ تومر، پرہلاد سنگھ پٹیل اور رینوکا سنگھ سروتا کے وزراء کی کونسل سے استعفے فوری طور پر منظور کر لیے ہیں۔
ان تمام وزراء نے حال ہی میں منعقدہ اسمبلی انتخابات میں کامیابی کے بعد اپنے عہدوں سے استعفیٰ دے دیا تھا۔
صدر جمہوریہ کے سکریٹریٹ کے مطابق محترمہ مرمو نے جمعرات کی رات ان تمام وزراء کے استعفے منظور کر لیے ۔
اس کے علاوہ صدر جمہوریہ نے وزیر اعظم کے مشورے کے مطابق کابینہ کے وزیر ارجن منڈا کو ان کی موجودہ وزارت کے علاوہ زراعت اور کسانوں کی بہبود کی وزارت کا چارج سنبھالنے کی ہدایت دی ہے ۔
وزیر مملکت شوبھا کرندلاجے کو فوڈ پروسیسنگ انڈسٹری کی وزارت میں وزیر مملکت کا اضافی چارج سنبھالنے کے لیے کہا گیا ہے اور وزیر مملکت راجیو چندر شیکھر کو وزارت جل شکتی میں وزیر مملکت کا اضافی چارج سنبھالنے کے لیے کہا گیا ہے ۔
وزیر مملکت ڈاکٹر بھارتی پروین پوار کو قبائلی امور کی وزارت میں وزیر مملکت کا اضافی چارج دیا گیا ہے ۔
واضح رہے کہ بھارتیہ جنتا پارٹی نے اسمبلی انتخابات جیتنے والے اپنے تمام 12 ممبران اسمبلی سے استعفیٰ دینے کو کہا تھا۔