حکومت قطر میں پھنسے نیول افسران کو رہا کرائے : کانگریس

نئی دہلی// لوک سبھا میں کانگریس کے لیڈر ادھیر رنجن چودھری نے پیر کے روز لوک سبھا میں وقفہ صفر کے دوران بحریہ کے آٹھ سابق افسران کو قطر کی عدالت کی طرف سے سنائی گئی موت کی سزا کا معاملہ اٹھایا اور ان کی جلد از جلد رہائی کے لئے کوشش کرنے کا حکومت سے مطالبہ کیا۔مسٹر چودھری نے کہا کہ بحریہ کے ان سابق افسران نے ملک کے لیے اپنی خدمات پیش کی ہیں۔ اب قطر میں انہیں سنگین مقدمات میں سزائے موت سنائی گئی ہے۔
حکومت کو چاہیے کہ وہ فوری ایکشن لے اور ان کو بچانے کے لیے ہر ممکن کوشش کرے۔کانگریس کے لیڈر کہا کہ بحریہ کے افسران اور جوان سمندر میں رہ کر ملک کی حفاظت کرتے ہیں۔ انہوں نے کہا کہ حکومت کو چاہیے کہ وہ بحریہ کے ان سابق افسران کی فوری مدد کرے جنہوں نے ملک کی حفاظت کے لیے اپنی بیش قیمت خدمات پیش کیں۔مسٹر چودھری نے کہا کہ قطر کی حکومت کے ساتھ ہمارے ملک کے اچھے تعلقات ہیں، ان تعلقات سے فائدہ اٹھاتے ہوئے حکومت تمام ذرائع استعمال کر نا چاہئے تاکہ ہندوستانی بحریہ کے ان سابق افسران کے خلاف الزامات کو جلد از جلد کالعدم کیا جائے۔