مودی جمعہ کو ساتویں انڈین موبائل کانگریس میں 100′ 5جی ایپ لیب کا آغاز کریں گے

نئی دہلی// وزیر اعظم نریندر مودی جمعہ کو دارالحکومت میں ٹیلی کام انڈسٹری کی اہم کانفرنس انڈین موبائل کانگریس (آئی ایم سی 2023) کے ساتویں ایڈیشن کا افتتاح کریں گے اور اس موقع پر وہ ملک بھر کے تعلیمی اداروں کو 100 ‘5 جی یوز کیس لیبز’ کا تحفہ دیں گے ۔
آئی ایم سی 2023 تین دن تک چلے گا۔ اس کا اہتمام پرگتی میدان کے بھارت منڈپم میں محکمہ ٹیلی کمیونیکیشن اور سیلولر سروس کمپنیوں کے منچ سی او اے آئی کے اشتراک سے کیا جا رہا ہے ۔
وزیر اعظم کے دفتر نے جمعرات کو جاری کردہ ایک ریلیز میں یہ معلومات دیتے ہوئے ، کہا کہ ‘100 5جی لیب انیشیٹو’ کا مقصد سماجی و اقتصادی شعبوں میں جدت کو فروغ دینے کے لیے 5جی ایپلی کیشنز تیار کرنا ہے ۔ ‘100 5جی لیبز انیشیٹو’ کے تحت تیار کردہ ان 5جی ایپ ڈویلپمنٹ لیبز کو ملک میں 6جی کے لیے تیار ماحولیاتی نظام کی تعمیر کی جانب ایک اہم قدم کے طور پر دیکھا جارہا ہے ۔
بیان میں کہا گیا ہے کہ ‘100 5جی لیبز انیشیٹو’ 5جی ایپلی کیشنز کی ترقی کی حوصلہ افزائی کرتے ہوئے 5جی ٹیکنالوجی سے وابستہ مواقع کو پورا کرنے کی ایک کوشش ہے جو ہندوستان کی منفرد ضروریات کے ساتھ ساتھ عالمی مطالبات کو بھی پورا کرتی ہے ۔
بیان کے مطابق یہ منفرد اقدام تعلیم، زراعت، صحت، بجلی، نقل و حمل وغیرہ جیسے مختلف سماجی و اقتصادی شعبوں میں جدت کو فروغ دے گا اور 5جی ٹیکنالوجی کے استعمال میں ملک کو آگے لے جائے گا۔ یہ اقدام ملک میں 6جی کے لیے تیار تعلیمی اور اسٹارٹ اپ ایکو سسٹم کی تعمیر کی جانب بھی ایک اہم قدم ہے ۔ یہ اقدام مقامی ٹیلی کمیونیکیشن ٹیکنالوجی کی ترقی کی طرف ایک قدم ہے جو قومی سلامتی کے لیے اہم ہے ۔
انڈیا موبائل کانگریس (آئی ایم سی) ایشیا کا سب سے بڑا ٹیلی کام، میڈیا اور ٹیکنالوجی پلیٹ فارم ہے اور 27 سے 29 اکتوبر 2023 تک منعقد ہوگا۔ یہ انعقاد ٹیلی کمیونیکیشن اور ٹکنالوجی میں ہندوستان کی ناقابل یقین ترقی کو اجاگر کرنے اور اہم باتیں سامنے لانے کے لئے ایک پلیٹ فارم کے طور پر کام کرے گا۔
‘گلوبل ڈیجیٹل انوویشن’ پر مرکوز آئی ایم سی 2023 کا مقصد اہم جدید ترین ٹیکنالوجی کے ڈویلپرز، مینوفیکچررز اور برآمد کنندگان کو اکٹھا کرکے ہندوستان کی پوزیشن کو مضبوط بنانے کی کوششوں کو فروغ دینا ہے ۔ تین روزہ کانگریس میں 5جی، 6جی، مصنوعی ذہانت (اے آئی) جیسی ٹیکنالوجیز کو اجاگر کیا جائے گا اور سیمی کنڈکٹر انڈسٹری، گرین ٹیکنالوجی، سائبر سیکورٹی وغیرہ سے متعلق امور پر تبادلہ خیال کیا جائے گا۔
اس سال، آئی ایم سی ایک سٹارٹ اپ پروگرام – ‘ایسپائر’ شروع کر رہا ہے ۔ یہ نئے کاروباری اقدامات اور تعاون کو متحرک کرنے کے مقصد سے اسٹارٹ اپس، سرمایہ کاروں اور قائم شدہ کاروباروں کے درمیان تعلقات کو فروغ دے گا۔
منتظمین کے مطابق، آئی ایم سی 2023 میں تقریباً 22 ممالک کے ایک لاکھ سے زائد شرکاء حصہ لیں گے ، جن میں تقریباً 5000 سی ای او سطح کے مندوبین، 230 نمائش کنندگان، 400 اسٹارٹ اپ اور دیگر اسٹیک ہولڈرز شامل ہوں گے ۔