بنگلورو// کرناٹک کے سابق وزیر اعلی اور جنتا دل (ایس) (جے ڈی ایس) کے سینئر لیڈر ایچ ڈی کمار سوامی نے ہفتہ کو 2024 کے لوک سبھا انتخابات کے لئے بھارتیہ جنتا پارٹی (بی جے پی) اور جے ڈی ایس کے قبل از انتخابی اتحاد کی خبروں کی تردید نہیں کی لیکن کہا کہ وہ مناسب وقت پر اس بارے میں بات کریں گے ۔
مسٹر کمارسوامی نے یہاں اپنی رہائش گاہ پر نامہ نگاروں سے کہا، "جب وقت آئے گا، میں اس کے بارے میں بتاؤں گا۔” انہوں نے کرناٹک لوک سبھا انتخابات میں بی جے پی اور جے ڈی ایس کے درمیان سیٹوں کی تقسیم کے بارے میں بات چیت کی خبروں کی تردید کی۔
انہوں نے کہا، ”سیٹوں کی تقسیم پر کوئی بات چیت نہیں ہوئی، منڈیا اور ٹمکورو میں سیٹوں کی تقسیم کا مسئلہ بات چیت کے لیے نہیں آیا۔ وقت آنے پر میں اس کے بارے میں بات کروں گا۔” کرناٹک کے سابق وزیر اعلیٰ بی ایس یدیورپا نے جمعہ کو ریاست میں لوک سبھا انتخابات لڑنے کے لیے بی جے پی اور جے ڈی ایس کے درمیان قبل از انتخابات اتحاد کی تصدیق کی تھی۔
انہوں نے کہا کہ مرکزی وزیر داخلہ اور بی جے پی کے سینئر لیڈر امیت شاہ نے جے ڈی ایس کو لوک سبھا کی چار سیٹیں دینے پر اتفاق کیا ہے جس سے پارٹی کو 25 یا 26 سیٹیں ایک ساتھ جیتنے میں مدد ملے گی۔حال ہی میں منعقدہ اسمبلی اجلاس میں دونوں جماعتیں کانگریس حکومت کی پالیسیوں کے خلاف لڑتی رہی ہیں۔ گزشتہ لوک سبھا الیکشن میں بی جے پی نے 28 میں سے 25 سیٹوں پر کامیابی حاصل کی تھی، جبکہ پارٹی کی حمایت یافتہ ایک آزاد نے ایک سیٹ جیتی تھی۔ کانگریس اور جے ڈی ایس کو ایک ایک سیٹ ملی۔
نائب وزیر اعلیٰ ڈی کے شیوکمار نے بی جے پی-جے ڈی ایس اتحاد کا خیرمقدم کیا تھا، لیکن شبہ ظاہر کیا کہ آیا اس کے بعد علاقائی پارٹی اپنا نظریہ برقرار رکھے گی۔ وزیر اعلیٰ سدارامیا نے کہا تھا کہ وہ بی جے پی اور جے ڈی ایس اتحاد سے فکرمند نہیں ہیں۔
کانگریس کے سینئر لیڈر اور وزیر ایم بی پاٹل نے بھی کہا تھا کہ بی جے پی اور جے ڈی ایس کے ساتھ آنے کے باوجود کانگریس کرناٹک میں کم از کم 20 لوک سبھا سیٹیں جیتے گی۔