کمر کا درد بہت پریشان کن تھا، الفاظ میں بیان نہیں کر سکتا: شریاس

نئی دہلی/// کمر کی سرجری کے بعد ایشیا کپ میں ہندوستانی ٹیم میں واپسی کرنے والے شریاس ایر نے کہا کہ ان کی کمر کا درد اتنا تکلیف دہ تھا کہ الفاظ میں بیان نہیں کیا جاسکتا۔
‘بی سی سی آئی ٹی وی’ پر ایک ویڈیو میں شریاس نے کہا، "یہ چوٹ مجھے کچھ عرصے سے پریشان کر رہی تھی۔ لیکن میں انجیکشن لگا کر زیادہ سے زیادہ میچ کھیلنے کی کوشش کر رہا تھا۔ تاہم ایک وقت ایسا آیا جب میں سمجھ گیا کہ اب مجھے سرجری کرانی پڑے گی۔ فزیو اور ماہرین نے بھی کہا کہ یہی بہترین آپشن ہوگا۔ دراصل میری رگوں کے درمیان ایک دباؤ سا تھا۔ سلیپڈ ڈسک میں اتنا دردناک درد تھا کہ یہ میری نسوں کو دبا رہا تھا اور میرے پیر کے انگوٹھے تک پہنچ رہا تھا۔ یہ خوفناک تھا اور میں بیان نہیں کر سکتا کہ مجھے کتنی تکلیف ہوئی تھی۔”
بالآخر اپریل میں شریاس کی لندن میں سرجری ہوئی اور اس کے بعد انہیں تین ہفتے ڈاکٹروں کی نگرانی میں گزارنے پڑے۔ اس کے بعد انہیں تین ماہ کی بحالی کے لیے این سی اے بھیج دیا گیا۔ یہ عمل گزشتہ ہفتے اس وقت ختم ہوا جب انہیں این سی اے کے چیف آف میڈیکل اسٹاف نتن پٹیل نے چند وارم اپ میچوں میں جانچنے کے بعد انتخاب کے لیے ہری جھنڈی دے دی۔
شریاس نے کہا "یہ اتار چڑھاؤ سے بھرا ہوا وقت تھا۔ تین ماہ پہلے تک مجھے بہت تکلیف تھی جو اس کے بعد کم ہونے لگی۔ لیکن اس دوران تمام فزیوز جسم کے تمام حصوں میں طاقت برقرار رکھنے کی کوشش کر رہے تھے۔ ایک پیشہ ور کھلاڑی کے لیے سب سے مشکل چیزوں میں سے ایک بحالی کے دوران درد کے ساتھ رہنا ہے۔ اس دوران میڈیکل ٹیم کے علاوہ اچھے دوستوں اور فیملی ممبرز کا تعاون ضروری ہے۔ یہاں تک کہ جب میں پریشان ہوتا تو وہ مجھے سنبھالتے تھے۔ ایسے وقت میں صبر بہت اہم بات ہوتی ہے اور میں اب جہاں ہوں وہاں بہت خوش ہوں۔ شاید میں نے سوچا بھی نہیں تھا کہ میں اتنی جلدی واپس آؤں گا۔”