نئی دہلی// انڈین ریلوے نے آج ایک مال ٹرین جس میں آلو، چینی سمیت کھانے پینے کا سامان لے کر منی پور پہنچایا، جو نسلی تشدد اور بدامنی کی وجہ سے ضروری اشیاء کی قلت کا سامنا کر رہا ہے ۔
منی پور کے وزیر اعلیٰ این برین سنگھ نے شمال مشرقی سرحدی ریلوے کے تحت ریاست کے کھونگسانگ اسٹیشن پر مال ٹرین کا استقبال کیا۔ اس موقع پر ریاستی حکومت کے دیگر وزراء اور سینئر افسران موجود تھے ۔
سرکاری ذرائع کے مطابق ریاستی حکومت نے ریاست میں نسلی تشدد اور بدامنی کی وجہ سے اشیائے ضروریہ کی عدم دستیابی سے دوچار لوگوں کو راحت اور مدد کے لیے مرکزی حکومت سے درخواست کی تھی۔ اس کے لیے ریلوے کو ضروری ہدایات دے دی گئیں۔ ریلوے نے ہفتہ کو مغربی بنگال کے دھوپگوری سے آلو کی دو ویگنیں نیو گوہاٹی بھیجی ہیں۔ نیو گوہاٹی سے چینی کی تین ویگنیں، پیکڈ جوس کی دو ویگنیں، کوکا کولا کی دو ویگنیں، آلو کے چپس کی ایک ویگن اور پیاز کی ایک ویگن شامل کی گئی۔
یہ مکسڈ گڈز ٹرین ہفتہ کو منی پور کے لیے روانہ کی گئی۔ آج صبح مال ٹرین منی پور کے کھونگسانگ پہنچی جہاں منی پور کے وزیر اعلیٰ این بیرین سنگھ اور دیگر ریاستی وزراء اور عہدیداروں نے مال ٹرین کا استقبال کیا۔ انہوں نے کہا کہ یہ ٹرین ریاست کے تشدد سے متاثرہ علاقوں میں لوگوں کو کھانے پینے کی پریشانی سے راحت فراہم کرے گی۔ وزیر اعلیٰ نے اس کے لیے مرکزی حکومت کا شکریہ ادا کیا۔