ایشیا کپ: ہندوستان کا پاکستان کے ساتھ پہلا میچ

کولمبو// ون ڈے ورلڈ کپ 2023 سے ٹھیک پہلے منعقد ہونے والے ایشیا کپ 2023 میں ہندوستان کی مہم 2 ستمبر کو روایتی حریف پاکستان کے خلاف شروع ہوگی۔
بدھ کو ٹورنامنٹ کے شیڈول کا اعلان کرتے ہوئے ایشین کرکٹ کونسل (اے سی سی) کے صدر جے شاہ نے کہاکہ ’’مجھے مردوں کے ون ڈے ایشیا کپ 2023 کے شیڈول کا اعلان کرتے ہوئے بے حد خوشی ہو رہی ہے، جو کہ اتحاد اور دوستی کی علامت ہے جو بہت سی قوموں کو متحد کرتا ہے۔‘‘
سری لنکا اور پاکستان کے مشترکہ طور پر منعقد ہونے والے اس ٹورنامنٹ کا آغاز 30 اگست کو ملتان میں پاکستان اور نیپال کے درمیان میچ سے ہوگا۔ بنگلہ دیش اور سری لنکا 31 اگست کو وسطی سری لنکا میں واقع شہر کینڈی میں مقابلہ کریں گے۔
ہندوستان اپنا پہلا میچ پاکستان کے خلاف کھیلنے کے بعد 4 ستمبر کو نیپال سے کھیلے گا۔ اگر ہندوستان سپر 4 کے لیے کوالیفائی کرتا ہے تو اس کا مقابلہ ایک بار پھر 10 ستمبر کو پاکستان سے ہوگا۔ اس کے علاوہ سپر 4 میں ہندوستان کا مقابلہ سری لنکا، بنگلہ دیش اور افغانستان کی کسی بھی دو ٹیموں سے ہوگا۔
ایشیا کپ 2023 کا فائنل 17 ستمبر کو سری لنکا کے شہر کولمبو میں کھیلا جائے گا۔ اس کے تقریباً تین ہفتے بعد 5 اکتوبر کو ہندوستانی سرزمین پر ورلڈ کپ شروع ہوگا۔
واضح رہے کہ ایشیا کپ 2023 پاکستان میں ہونے جا رہا تھا لیکن بورڈ آف کنٹرول فار کرکٹ ان انڈیا (بی سی سی آئی) کی جانب سے ٹیم کو پڑوسی ملک بھیجنے سے انکار کے باعث ٹورنامنٹ کا انعقاد ‘ ہائبرڈ فارمیٹ میں منعقد کیا جارہا ہے۔
ایشیا کپ کا شیڈول:
پاکستان بمقابلہ نیپال (30 اگست، ملتان)
بنگلہ دیش بمقابلہ سری لنکا (31 اگست، کینڈی)
بھارت بمقابلہ پاکستان (02 ستمبر، کینڈی)
بنگلہ دیش بمقابلہ افغانستان (03 ستمبر، لاہور)
بھارت بمقابلہ نیپال (04 ستمبر، کینڈی)
افغانستان بمقابلہ سری لنکا (05 ستمبر، لاہور)
…………… سپر فور:
اے1 بمقابلہ بی2 (6 ستمبر، لاہور)
بی1 بمقابلہ بی2 (9 ستمبر، کولمبو)
اے1 بمقابلہ اے2 (10 ستمبر، کولمبو)
اے2 بمقابلہ بئ1 (12 ستمبر، کولمبو)
اے1 بمقابلہ بی1 (14 ستمبر، کولمبو)
اے2 بمقابلہ بی2 (15 ستمبر، کولمبو)
فائنل (17 ستمبر، کولمبو)
نوٹ: پاکستان ہمیشہ اے1 ہوگا، جب کہ ہندوستان اے2 ہوگا۔ اگر ان دونوں میں سے کوئی بھی سپر 4 تک نہیں پہنچ پاتا ہے تو نیپال اس کی جگہ لے گا۔ سری لنکا ہمیشہ بی1 رہے گا، جبکہ بنگلہ دیش بی2 ہوگا۔ اگر ان دونوں میں سے کوئی بھی سپر 4 میں نہ پہنچ سکا تو افغانستان اس کی جگہ لے لے گا۔