مودی حکومت نے توانائی کے شعبے میں زبردست انقلاب برپا کیا:مرکزی وزیر توانائی آر کے سنگھ

نئی دہلی// گزشتہ نو برسوں کے دوران مودی سرکار نے بجلی کے شعبے میں ایک غیر معمولی انقلاب برپا کیا ہے ۔ مسلسل لوڈ شیڈنگ اور بجلی کے خسارے کے دن اب قصہ پارینہ بن چکے ہیں۔ان خیالات کا اظہار مرکزی وزیر توانائی آر کے سنگھ نے یہاں کیا۔
انھوں نے مزید کہا کہ مودی حکومت نے پاور سیکٹر میں قابل ذکر تبدیلی کی قیادت کی ہے ۔ پیداواری صلاحیت کو بڑھانے ، ٹرانسمیشن نیٹ ورکس میں اضافہ کرنے ، بجلی تک رسائی بڑھانے ، قابل تجدید توانائی کو فروغ دینے اور جامع اصلاحات کو نافذ کرنے پر توجہ مرکوز کرتے ہوئے ، ہندوستان نے بے مثال سنگ میل طے کئے ہیں۔ ماحولیات، توانائی کی کارکردگی اور پائیدار ترقی کے تئیں حکومت کے پختہ عزم نے ہندوستان کو توانائی کی منتقلی میں ایک عالمی رہنما کے طور پر پیش کیا ہے ۔ قابل تجدید توانائی کے شعبے میں بڑھتے ہوئے اہداف اور کاربن کے اخراج میں مزید کمی کے ساتھ، مودی حکومت ہندوستان کے پاور سیکٹر کے مستقبل کو تقویت دینے کا عمل جاری رکھے ہوئے ہے ۔
مسٹر سنگھ نے کہا کہ ٹرانسمیشن کے شعبے میں بھی نمایاں پیش رفت ہوئی ہے ۔ 2013 سے ، تقریباً دو لاکھ سرکٹ کلومیٹر پر محیط ٹرانسمیشن لائنوں کا ایک وسیع نیٹ ورک قائم کیا گیا ہے ، جو پورے ملک کو ایک ہی فریکوئنسی پر کام کرنے والے ایک مربوط گرڈ سے جوڑتا ہے ۔ یہ ٹرانسمیشن لائنیں، جن میں کے وی 800 ایچ وی ڈی سی جیسی جدید ترین ٹیکنالوجیز کا استعمال کیا جاتا ہے ، کچھ انتہائی دشوار گزار اور پرخطر علاقوں سے ہو کر گزرتی ہے ، جن میں بشمول سرینگر- لیہہ لائن بھی شامل ہے جو سطح سمندر سے 15000/16000 فٹ کی بلندی پر ہے ۔ ملک کے ایک کونے سے دوسرے کونے میں 112 گیگاواٹ بجلی کی منتقلی کی صلاحیت، جو کہ 2014 میں صرف 36 گیگاواٹ تھی، نے ہندوستان کو ایک متحد پاور مارکیٹ میں تبدیل کر دیا ہے ، جس سے تقسیم کار کمپنیوں کو ملک بھر میں کسی بھی بجلی پیدا کرنے والی کمپنی سے بلند ترین مسابقتی شرح پر زیادہ سے زیادہ بجلی خریدنے کی راہ ہموار ہوتی ہے ۔ اس کے نتیجے میں صارفین کے لیے بجلی کے نرخ کم ہوئے ہیں۔