سنہا کی ایشیائی کھیلوں کیلئے ہندوستانی ووشو ٹیم کھلاڑیوں اور کوچوں سے ملاقات

سرینگر//
لیفٹیننٹ گورنر منوج سِنہا نے آج راج بھون میں۱۹ویں ایشیائی کھیلوں کیلئے ہندوستانی ووشو ٹیم کے کھلاڑیوں اور ان کے کوچوں کے ساتھ اِستفساری گفتگو کی۔
لیفٹیننٹ گورنر نے سرینگر میں تربیتی کیمپ میں شرکت کرنے والے کھلاڑیوں کو پورے جموںوکشمیر یوٹی کی طرف سے اَپنی نیک تمنائوں اوردعائوں کا اِظہار کیا۔
سنہا نے کہا’’ مجھے یقین ہے کہ ہمارا دستہ اعزاز حاصل کرے گا اور ملک کا سر فخر سے بلند کرے گا۔‘‘
ووشو کھلاڑی سرینگر میں نیشنل کوچنگ کیمپ میں شرکت کر رہے ہیں جس کا اہتمام سپورٹس اَتھارٹی آف اِندیا اور وزارتِ امورِ نوجوان و کھیل کود نے کیا ہے جس کے بعد وہ۵؍ اگست کو چین روانہ ہوں گے۔
اس دوران چیئرمین ضلع ترقیاتی کونسل سرینگر آفتاب ملک ، سابق وزیر سکھ نندن چودھری اور عوامی وفود نے آج راج بھون میں لیفٹیننٹ گورنر منوج سِنہا سے ملاقات کی۔
سویۂ بُگ بڈگام سے تعلق رکھنے والے پی آر آئی ممبران کے ایک وفد نے محمد اشرف آزاد کی قیادت میں لیفٹیننٹ گورنر سے ملاقات کی اور انہیں اَپنے علاقے کے ترقیاتی مطالبات سے آگاہ کیا۔
بعد میں یوتھ ڈیولپمنٹ فورم چاڈورہ کے وفود اورنائب صدر بی جے پی پلوامہ محترمہ ماہی عرفان نے بھی لیفٹیننٹ گورنر سے ملاقات کی اور اَپنے اَپنے علاقوں کے ترقیاتی مسائل سے آگا ہ کیا۔
لیفٹیننٹ گورنر نے دوران بات چیت وفود کے اَرکان کو ان کی طرف سے پیش کردہ مسائل اور مطالبات پر مناسب کارروائی کا یقین دِلایا۔