وادی بھر میں حضرت عثمان غنیؐ کا عرس عقیدت و احترام کے ساتھ منایا گیا

سرینگر//
وادی کے اطراف وکناف میں امیر المومنین حضرت عثمان غنیؓ کے عرس پر روح پرور مجالس کا اہتمام ہوا۔
درگاہ حضرت بل میں نماز پنجگانہ کے بعد زائرین موئے مقدسؐ کے دیدار سے فیضیاب ہوئے ۔
اطلاعات کے مطابق جموں وکشمیر میں جمعے کے روز خلیفہ سوم حضرت عثمان غنیؓ کا عرس مبارک عقیدت و احترام کے ساتھ منایا گیا اور اس حوالے سے درگاہوں اور خانقاہوں میں روح پرور مجالس کا اہتمام ہوا۔
جھیل ڈل کے کناروں پر واقع آثار شریف درگاہ حضرت بل میں جمعہ نماز پر لوگوں کی بھاری تعداد نے با جماعت نماز کی ادائیگی کے بعد موئے پاک ؐ کے دیدار سے فیضاب ہوئے ۔ اس موقع پر علمائنے دین اسلام کے اس عظیم فرزند کو انکی جلیل القدر اور بے مثال دینی و اسلامی خدمات کے لئے شاندار الفاظ میں خراج عقیدت پیش کیا۔
علماء نے کہاکہ دین اسلام کے اس بے باک رہنما نے اپنے ذریں خدمات سے دنیا کو عدل و انصاف، مساوات، مذہبی رواداری اور انسان دوستی کے اسلامی اور آفاقی اصولوں کو عام کرنے کے علاوہ دعوت و تبلیغ کے حوالے سے جو انمٹ اور تاریخ ساز کارنامے انجام دئے ہیں وہ رہتی دنیا تک ایک درخشندہ مثال اور نمونہ ہے ۔
علماء نے خلیفہ سوئم کے بیش بہا کارناموں اور عالم انسایت پر آپ کے احسانات کو ہر سطح پر اور ہر لحاظ سے لافانی اور ناقابل فراموش قرار دیا۔