محمد رضوان قومی کرکٹ ٹیم کے ’’یوسین بولٹ‘‘ بن گئے

کراچی//قومی کرکٹ ٹیم کے کھلاڑیوں کی فٹنس جانچنے کے لیے کوچنگ اسٹاف نے دوڑ کا مقابلہ کرایا تو وکٹ کیپر محمد رضوان یوسین بولٹ بن گئے۔
اے آر وائی نیوز کے مطابق پاکستان رواں ماہ سری لنکا سے دو ٹیسٹ میچوں پر مبنی سیریز کھیلنے کی تیاریوں میں مصروف ہے۔ ان ہی تیاریوں کے سلسلے میں ٹیم کے کوچنگ اسٹاف نے کھلاڑیوں کی فٹنس جانچنے کے لیے ان میں دوڑنے کا مقابلہ کرایا تو وکٹ کیپر بیٹر محمد رضوان یوسین بولٹ بن گئے۔
تیز دوڑنے کے اس مقابلے میں محمد رضوان کے علاوہ کپتان بابر اعظم، شاہین شاہ آفریدی، محمد نواز اور سرفراز احمد نے حصہ لیا۔
دوڑ کے اس مقابلے میں محمد رضوان نے کپتان سمیت تمام کھلاڑیوں کو پیچھے چھوڑ دیا اور سب سے پہلے 9.55 سیکنڈ میں راؤنڈ میں مکمل کیا جب کہ شان مسعود دوسرے نمبر پر رہے۔
واضح رہے کہ یوسین بولٹ دنیا کے نامور ایتھلیٹ ہیں جن کا تعلق جمیکا سے ہیں اور انہیں دنیا کا تیز ترین انسان بھی قرار دیا گیا ہے۔