نہیں جانتے ہیں… بالکل بھی نہیں جانتے ہیں کہ… کہ پٹنہ میں جمعہ کو ملک کی اپوزیشن پارٹیوں کی میٹنگ کیا گل کھلائے گی… اس سے کیا حاصل ہو گا … بہت سے سیاسی پنڈت آج اور ابھی سے اس میٹنگ‘ اس پہل کو کامیاب یا ناکام قرار دینے کا فتویٰ جاری کرنے کیلئے بے تاب نظر آ رہے ہیں… لیکن… لیکن صاحب ہمیں ایسی کوئی جلدی نہیں ہے… ہم کسی جلدی میں نہیں ہیں کہ… کہ ہماراجاننا اور ماننا ہے کہ ملک کی اہم سیاسی جماعتوں کا ایک دن ‘ ایک جگہ ‘ ایک وقت پر جمع ہو نا ایک بڑی بات ہے… ایک بڑی کامیابی ہے … اور اس لئے ہے کیونکہ سیاسی جماعتوں کے جو آپسی مفادات ہیں وہ ایک دوسرے سے متصادم ہیں… کیجریوال اور اس کی پارٹی نے اس میٹنگ سے پہلے ہی کانگریس پارٹی کیخلاف جس جارحانہ رویے کا مظاہرہ کیا ‘ وہ اس بات کی چغلی کھارہا ہے کہ … کہ اپوزیشن جماعتوں میں اتحاد‘ ایک مشترکہ لائحہ عمل پر اتفاق … اگر ناممکن نہیں ‘ لیکن مشکل ضرور ہے… بہت مشکل ہے … اسی نوعیت کی ایک اور میٹنگ اگلے ماہ شملہ میں ہو گی… دیکھنا پڑے گا کہ اس وقت تک کیا اپوزیشن جماعتوں کے تعلقات میں اتنی گرم جوشی برقرار رہے گی کہ وہ پٹنہ کی ہی طرح شملہ بھی پہنچ جائیں گی… خاص کر کیجریوال صاحب … جو خود کو ملک کی سیاست کا ایک بڑا صاحب سمجھتا ہے… سمجھتا ہے‘ لیکن ہے نہیں ۔پٹنہ میٹنگ میں سیاسی باتیں ہوئیں اور ڈھیر ساری ہوئیں… لیکن …لیکن اپنے لالو یادو نے ایک غیر سیاسی بات بھی کی … اس غیر سیاسی بات میں کتنی سیاست تھی ‘ وہ ہم نہیں جانتے ہیں… لیکن انہوں نے راہل بابا کو شادی کرنے کا مشورہ دیکر غیر سیاسی بات ضرور کی… ہمارا جاننا اور ماننا ہے کہ … کہ اپوزیشن جماعتوں کی میٹنگ کا اگر کوئی نتیجہ نہ نکلے … اگر وہ ایک بار پھر ۲۰۲۴ میں بی جے پی کیلئے میدان کھلا چھوڑ دیں تو… تو چھوڑ دیں … لیکن… لیکن اگر راہل بابا اس بیچ لالو جی کا مشورہ مان کر شادی کر لیں تو… تو ہم سمجھیں گے کہ …کہ اپوزیشن جماعتوں کی میٹنگ کا کوئی تو نتیجہ قوم کے سامنے آگیا …وہ کیا ہے کہ… نہرو… اندرا گاندھی … راجیو گاندھی … راہل گاندھی … …اور پھر؟ بھئی خاندانی راج برقرار رکھنے کیلئے کوئی تو وارث چاہئے اور… اور شاید یہی سوچ کر اپنے لالو یادو نے راہل بابا کو شادی کرنے کا مشورہ دیا … جو بالکل بھی غیر سیاسی نہ تھا … کیا آپ بھی ایسا ہی مانتے ہیں… کہ یہ ایک غیر سیاسی مشورہ نہیں بلکہ سیاسی مشورہ تھا ۔ہے نا؟
