پاکستانی کرکٹ ٹیم کے سابق ہیڈکوچ اور کپتان مصباح الحق کا کہنا ہے کہ ورلڈکپ کا فائنل پاکستان اور بھارت کے درمیان دیکھنا خواہش ہے۔
بھارتی اسپورٹس چینل کو دیئے گئے انٹرویو میں سابق ہیڈکوچ مصباح الحق نے کہا کہ پاکستانی اور بھارتی فینز کی یہی خواہش ہوتی ہے کہ ہندوستان اور پاکستان کے درمیان ورلڈکپ کا فائنل ہو، لیکن جو ٹیم اچھا کھیلے گی وہ فائنل کھیلے گی۔
انہوں نے کپتان بابراعظم اور بھارتی بلےباز ویرات کوہلی کی تعریف کی اور کہا کہ ایک دہائی کے دوران ویرات کوہلی سے بڑا کوئی بیٹر میری نظر میں نہیں البتہ بابراعظم نے اب اپنے پاؤں جمائے ہیں اور مسلسل ریکارڈز پر نظریں رکھے ہوئے ہیں۔
دوسری جانب غیر حتمی شیڈول کے مطابق ورلڈ کپ میں پاک، بھارت کرکٹ جنگ کا دن مقرر ہوگیا جبکہ دونوں روایتی حریفوں کے درمیان ٹاکرا 15 اکتوبر کو احمد آباد میں منعقد ہوگا۔
2019 میں سنسنی خیز فائنل کھیلنے والی انگلینڈاور نیوزی لینڈ کی ٹیمیں بھی 15 اکتوبرکو افتتاحی دن میدان میں اتریں گی۔کرک انفو کے مطابق بھارتی ٹیم اپنے لیگ میچز ملک کے مختلف 9 وینیوز پر کھیلے گی، پاکستانی ٹیم کو لیگ میچز میں 5 وینیوز پر حریف ٹیموں کا سامنا کرنا ہوگا، پاکستان کو کوالیفائر سے آنے والی 2 ٹیموں کیخلاف 6 اور 12 اکتوبر کو حیدرآباد دکن میں کھیلنا ہوگا، جس کے بعد گرین شرٹس 20 اکتوبر کو بنگلور میں آسٹریلیا کے مقابل آئیں گے۔
دریں اثنادل میں تکلیف کی وجہ سے انٹرنیشنل کرکٹ سے دور ہونے والے اوپنر عابد علی کی ڈیڑھ سال بعد ایک بار پھر سے پی سی بی کیمپ میں باقاعدہ انٹری ہوگئی جہاں ڈاکٹرز کی اجازت سے اوپنر نے بیٹنگ کے جوہر دکھائے۔۔ہیڈکوچ گرانٹ بریڈ برن نے اسپنرز اور بیٹرز کے خصوصی کیمپ میں عابد علی کو بھی بلانے کی ہدایت تھی، کیمپ کے پہلے دو روز پی سی بی میڈیکل پینل کی طرف سے اوپنر کے دل سمیت تمام میڈیکل ٹیسٹ کرائے گئے جن کی رپورٹس منگل کو موصول ہوئیں۔
رپورٹس کلیئر آنے پر میڈیکل پینل نے عابد علی کو مکمل صحت یاب قرار دے کر ٹریننگ کیمپ کا حصہ بننے کی اجازت دی۔
واضح رہے کہ 16 ٹیسٹ اور چھ ون ڈے میچز میں ملک کی نمائندگی کرنے والے عابد علی نے چار دسمبر دوہزار اکیس کو میرپور میں بنگلہ دیش کے خلاف آخری ٹیسٹ میں حصہ لیاتھا، اکیس دسمبر کو کراچی میں ڈومیسٹک میچ کے دوران انہیں دل میں تکلیف محسوس ہوئی جس پر اسپتال منتقل کیا گیا جہاں شریانیں بند ہونے کا انکشاف ہوا تھا۔
پی سی بی نے ان کا علاج کرایا، صحت یابی کے چھ ماہ بعد انہوں نے ڈومیسٹک کرکٹ ٹورنامنٹ کھیلا، اب پہلی بار عابد علی قومی ٹیم کے ٹریننگ کیمپ کا حصہ بنے ہیں۔
قومی ٹیم کے ہیڈکوچ گرانٹ بریڈ برن کے مطابق عابد علی ٹیسٹ کرکٹ میں انچاس کی اوریج رکھنے والے زبردست بیٹر ہیں، دل کے مسئلے کے بعد ان کی فٹنس اور فارم کا جائزہ لیں گے، اگر وہ خود کو ایک بارپھر منوانے میں کامیاب ہوجاتےہیں تو بہت خوشی ہوگی۔
دریں اثنا ہیڈکوچ گرانٹ بریڈ برن کی نگرانی میں قومی کرکٹرز نے سہہ پہر کے سیشن میں ایل سی سی اے گراؤنڈ میں لگاتار دوسرے روز بھی میچ سنیاریو میں اپنی خامیوں کو دورکرنے کی کوشش کی، کوچز نے کھلاڑیوں کو انفرادی طور بھی اسپن بولنگ کھیلنے کی پریکٹس کرائی۔
اسپنرز کا جمعرات کوکیمپ میں آخری دن ہے، اس کے بعد جمعے سے فاسٹ بولرز اس خصوصی کیمپ کا حصہ بن جائیں گے۔
