سرینگر//
جی ٹونٹی اجلاس کے پیش نظر ہفتے کے روز سی آر پی ایف کمانڈوز‘مارکوز اور بلیک کیٹ کمانڈوز کی جانب سے جھیل ڈل اوراس کے ملحقہ علاقوں میں فرضی ڈرل کا اہتمام کیا گیا۔
معلوم ہوا ہے کہ جھیل ڈل اورایس کے آ ئی سی سی کو سیکورٹی فورسز نے پوری طرح سے اپنی تحویل میں لے لیا ہے ۔شہر سری نگر میں جی ٹونٹی سربراہی اجلاس کے پیش نظر ہائی الرٹ جاری کیا گیا ہے ۔اطلاعات کے مطابق جی ٹونٹی اجلاس کے پیش نظر وادی کشمیر بالخصوص سرینگر کے قرب و جوار میں سیکورٹی کا فقیدالمثال بندوبست کیا گیا ہے ۔
کسی بھی ممکنہ ناخوشگوار واقعے کو ناکام بنانے کیلئے بھاری تعددد میں سیکورٹی اہلکاروں کو تعینات کیا گیا ہے ۔
یو این آئی اردو کے ایک نامہ نگار نے ہفتے کے روز شہر سرینگر کے مختلف علاقوں کا دورہ کرکے بتایا کہ شہر کے تمام علاقوں میں سیکورٹی کے سخت انتظامات کئے گئے ہیں اور ناکوں کے جال کو مزید وسیع کردیا گیا ہے ۔انہوں نے بتایا کہ جنگی سازو سامان سے لیس سیکورٹی اہلکار انتہائی چوکنا ہیں اور ناکوں پر موٹر سائیکلوں کی ضبطی کا سلسلہ بھی جاری ہے ۔
نامہ نگار نے بتایا کہ ناکوں پر مسافربردار گاڑیوں کی بھی تلاشی لی جاتی ہے اور ان میں سوار مسافروں کی بھی جامہ تلاشی اور ان کے شناختی کارڈ چیک کئے جاتے ہیں۔
نامہ نگار نے بتایا کہ لالچوک، بتہ مالو، جہانگیر چوک، ہر سنگھ ہائی اسٹریٹ، ریگل چوک، بلوارڈ، نشاط ، شالیمار اور جھیل ڈل کے اندرون علاقوں میں اہم چوراہوں پر لگے ناکوں پر گاڑیوں، راہگیروں خاص کر موٹر سائیکل سواروں کو روکا جا رہا ہے اور ان کی جامہ تلاشی اور شناختی کارڈوں کی چیکنگ کی جارہی ہے ۔
ہفتے کے روز سی آر پی ایف کمانڈوز، مارکوز، بلیک کیٹ کمانڈوز نے جھیل ڈل اور اس کے ملحقہ علاقوں میں مورک ڈرل کی۔ان کے مطابق جھیل ڈل کے اردگرد علاقوں پر خصوصی ڈرون کیمروں کے ذریعے نظر گزر رکھی جارہی ہیں۔
سٹی رپورٹر نے بتایا کہ ملی ٹینٹوں کے منصوبوں کو ناکام بنانے کی خاطر شہر میں ہائی الرٹ جاری کیا گیا اور کسی کو بھی بغیر تلاشی کے آگے جانے کی اجازت نہیں دی جارہی ہے۔