ہندوستانی خواتین ہاکی ٹیم آسٹریلیا کے خلاف پانچ میچوں کی سیریز کھیلے گی

ایڈیلیڈ// ہندوستانی خواتین ہاکی ٹیم آسٹریلیا کے خلاف بدھ سے ایڈیلیڈ کے میٹ اسٹیڈیم میں 18 سے 27 مئی تک پانچ میچوں کی سیریز کھیلنے جا رہی ہے۔
سیریز کے پہلے تین میچوں میں ٹیم کی قیادت گول کیپر سویتا اور نائب کپتان دیپ گریس ایکا کریں گی۔ ہندوستانی ٹیم کے لیے یہ دورہ آئندہ ہانگژو ایشین گیمز 2023 سے قبل تیاریوں کا حصہ ہے۔
ہندوستانی ٹیم اپنے دورے کا آغاز 18 مئی کو آسٹریلیا کے خلاف میچ سے کرے گی اور 20 اور 21 مئی کو بیک ٹو بیک میچ کھیلے گی۔ اس کے بعد ٹیم آسٹریلیا کی ٹیم اے کے خلاف 25 اور 27 مئی کو کھیلے گی۔ آسٹریلیا کی خواتین ہاکی ٹیم اس وقت دنیا میں تیسرے نمبر پر ہے جبکہ ہندوستانی ٹیم آٹھویں نمبر پر ہے۔
ہندوستانی خواتین کی ہاکی ٹیم 14 مئی کو ایڈیلیڈ پہنچی تھی اور تب سے وہ یہاں تربیت کر رہی ہے۔
کپتان سویتا نے کہا، ’’ہم ہر روز شام کو ٹریننگ کر رہے ہیں، یہاں تک کہ رات تک، تاکہ ہماری ٹیم ایڈیلیڈ میں کھیلنے سے پہلے تیار ہو کیونکہ ہمارا میچ شام کو ہونے والا ہے۔‘‘
انہوں نے مزید کہا کہ "ہم نے آج صبح ایک ٹریننگ سیشن بھی کیا اور ٹیم نے کچھ میچ پریکٹس کی تاکہ ہم کل اپنے پہلے میچ کے لیے تیار ہوں۔”
دریں اثنا، ہندوستانی خواتین ہاکی ٹیم کے ہیڈ کوچ جینکے شاپ مین نے کہا کہ ٹیم آسٹریلیا کے خلاف کھیلنے کے لیے پوری طرح تیار ہے۔
شاپ مین نے کہا کہ کھلاڑی پرجوش اور آسٹریلیا کا مقابلہ کرنے کے لیے تیار ہیں۔ یہاں کا موسم بہت اچھا ہے۔ ہم اچھا محسوس کر رہے ہیں اور یہ دکھانے کے لیے تیار ہیں کہ ہم نے پچھلے چند ہفتوں میں کیا مشق کی ہے۔
دلچسپ بات یہ ہے کہ ہندوستانی خواتین کی ہاکی ٹیم نے 2021 ٹوکیو اولمپکس کے سیمی فائنل میں آسٹریلیا کو 1-0 سے شکست دی تھی۔ یہ ہندوستانی ٹیم کے لئے ایک تاریخی جیت تھی کیونکہ ہندوستانی خواتین کی ہاکی ٹیم تیسری بار اولمپکس میں حصہ لے رہی تھی اور اس نے پہلی بار کوارٹر فائنل کے لئے کوالیفائی کیا تھا جبکہ آسٹریلیا تین بار گولڈ میڈل جیتنے والی ٹیم تھی۔
ہندوستانی ٹیم نے برمنگھم میں کامن ویلتھ گیمز کے سیمی فائنل میچ میں آسٹریلیا کے خلاف سخت مقابلہ کیا اور اسکور 1-1 سے برابر کردیا۔
ہندوستان کا دورہ آسٹریلیا ڈی ڈی اسپورٹس پر براہ راست نشر کیا جائے گا۔