فلم دی کیرالہ سٹوری پر جی ایم سی جموں کے ہوسٹل میں ہاتھا پائی‘۵ طالب علم زخمی:پرنسپل

جموں//
فلم دی کیرالہ سٹوری پر گورنمنٹ میڈیکل کالج جموں کے ہوسٹل میں دو گروپوں کے درمیان ہاتھاپائی ہوئی جس دوران پانچ طالب علم زخمی ہوے ۔
گورنمنٹ میڈیکل کالج کی پرنسپل نے بتایا کہ جھگڑے کے دوران پانچ طالب علم زخمی ہوے جنہیں طبی امداد کے بعد ہسپتال سے رخصت کیا گیا۔انہوں نے بتایا کہ معاملے کی تحقیقات جاری ہے اور ملوثین کو بخشا نہیں جاے گا۔
پولیس ذرئع نے بتایا کہ فلم ’دی کیرالہ سٹوری‘ کو لے کر گورنمنٹ میڈیکل کالج جموں کے بائز ہوسٹل کے اندر دو گروپوں کے درمیان ہاتھا پائی شروع ہوئی جس نے جھگڑے کا رخ اختیار کیا۔انہوں نے بتایا کہ اس آپسی لڑائی میں پانچ طالب علم زخمی ہوے جن کو علاج ومعالجہ کی خاطر نزدیکی ہسپتال منتقل کیا گیا۔
ان کے مطابق پولیس نے فوری کارروائی عمل میں لا کر دونوں گروپوں کو پر امن طورپر منتشر کیا۔
ایس ایس پی جموں چندن کوہلی نے بتایا کہ گورنمنٹ میڈیکل کالج جموں کے ہوسٹل میں کچھ طلبا کے درمیان لڑائی ہوئی ۔ان کے مطابق معاملے کو سنجیدگی سے لیتے ہوئے کیس درج کرکے تحقیقات شروع کی گئی ۔
دریں اثنا پیر کے روز گورنمنٹ میڈیکل کالج جموں میں طلبا نے کلاسوں کا بائیکاٹ کرکے احتجاجی مظاہرئے کئے ۔انہوں نے بتایا کہ باہر سے کچھ لوگوں کو بلایا گیا جنہوں نے ہوسٹل میں نعرے بازی شروع کی اور ایک طالب علم کے سر پر وار کیا جس وجہ سے وہ شدید طورپر زخمی ہوا ہے ۔ان کے مطابق پولیس کو معاملے کا سخت نوٹس لیتے ہوئے ملوثین کے خلاف کارروائی عمل میں لانی چاہئے ۔انہوں نے مزید بتایا کہ کالج کے پر امن ماحول کو خراب کرنے کی خاطر ایسا کیا گیا جو ناقابل برداشت ہے ۔
گورنمنٹ میڈیکل کالج کی پرنسپل ششی سودھان نے نامہ نگاروں سے بات چیت کے دوران بتایا کہ ہوسٹل احاطے میں جھگڑے کے دوران پانچ طالب علم زخمی ہوے جنہیں علاج ومعالجہ کی خاطر ہسپتال منتقل کیا گیا۔ انہوں نے کہاکہ صرف ایک بچے کو ٹانکے لگے ہیں باقی سب کو ہسپتال سے رخصت کیا گیا۔
سودھان نے بتایا ’’ جیسے ہی مجھے اطلاع ملی تو فوری طورپر ہسپتال پہنچی اور وہاں پر زخمی طالب علموں کی عیادت کی‘‘۔ان کے مطابق واٹس اپ مسیج کی وجہ سے یہ سب کچھ ہوا ہے ۔
پرنسپل نے مزید بتایا کہ ایف آئی آر درج کرکے ملوثین کے خلاف کارروائی ہوگی۔انہوں نے بتایا کہ میڈیکل کالج میں اس طرح کے واقعات کو برداشت نہیں کیا جاے گا۔