وادی میں غیر موسمی برفباری :گلمرگ، پہلگام، سونمرگ اور قاضی گنڈ میں برفباری سے موسم سرد

سرینگر//
کشمیر کے کچھ حصوں میں غیر موسمی برف باری نے وادی میں سردیوں جیسے حالات کو واپس لایا جبکہ سیاحوں اور خانہ بدوشوں کے خراب موسم کی وجہ سے پھنس جانے کے کئی واقعات بھی رپورٹ ہوئے ہیں۔
عہدیداروں نے بتایا کہ وادی کے گلمرگ، پہلگام، سونمرگ اور قاضی گنڈ علاقوں میں صبح سویرے برف باری ہوئی، جس سے سڑکیں پھسلن ہوگئیں۔
محکمہ موسمیات نے اگلے۲۴گھنٹوں کے دوران موسم کی صورتحال میں بہتری کی پیش گوئی کی ہے لیکن منگل کی شام کو بادل پھٹنے یا آسمانی بجلی گرنے کے امکان سے خبردار کیا ہے۔
موسمیات کے حکام نے بتایا کہ دن کا درجہ حرارت ۲۴ ڈگری سیلسیس کے معمول کے مقابلے میں تقریباً ۱۲ ڈگری سیلسیس تک گر گیا ہے۔ جہاں سیاح برف باری پر خوشگوار حیرت میں مبتلا تھے وہیں خراب موسم نے مقامی لوگوں کو مشکلات کا سامنا کرنا پڑا۔
غیر موسمی برف باری کی وجہ سے بہت سے خانہ بدوش لوگ اور ان کے مویشی پھنس گئے۔ انہوں نے بتایا کہ کولگام ضلع کے قاضی گنڈ علاقے میں کوریگام میں پولیس اور میونسپل اہلکاروں نے۲۵۰سے زیادہ بھیڑوں کو بچایا جب جانور ایک مقامی ندی کے پانی کی سطح میں اچانک اضافے کی وجہ سے ایک جزیرے پر پھنس گئے تھے۔
حکام نے بتایا کہ کئی خانہ بدوش خاندانوں کو ضلع کے بالائی علاقوں میں محفوظ مقامات پر منتقل کر دیا گیا ہے۔
محکمہ موسمیات کے مطابق وادی میں اگلے چوبیس گھنٹوں کے دوران مزید بارشوں کا امکان ہے تاہم۹مئی سے موسم میں بہتری متوقع ہے ۔انہوں نے کہا کہ وادی میں۹مئی کو بھی دوپہر کے بعد کہیں کہیں گرج چمک کے ساتھ بارشوں کو خارج از امکان قرار نہیں دیا جا سکتا ہے ۔
ان کا کہنا تھا کہ بعد ازاں وادی میں۱۰سے۱۵مئی تک موسم خشک رہنے کا امکان ہے اس دوران درجہ حرارت میں بھی اضافہ درج ہوسکتا ہے ۔
محکمے نے باغ مالکان سے ۸مئی تک باغوں کی دوا پاشی کرنے سے احتراز کرنے کی تاکید کی ہے جبکہ سیاحوں سے اپنے ساتھ گرم کپڑے رکھنے کو کہا گیا نیز سری نگر-جموں قومی شاہراہ اور سرینگر، لیہہ شاہراہ پر سفر کرنے والوں سے کہا گیا ہے کہ وہ سفر اختیار کرنے سے قبل متعلقہ حکام کے ساتھ رابطہ کریں۔
اطلاعات کے مطابق گلمرگ، قاضی گنڈ، بانڈی پورہ، دودھ پتھری، کپوارہ اور جنوبی کشمیر کے پیر پنچال پہاڑی علاقوں میں تازہ برف باری ہوئی ہے جس سے کھڑی فصلوں اور میوہ باغوں کو نقصان پہنچا ہے ۔
متعلقہ محکمے کے مطابق گذشتہ چوبیس گھنٹوں کے دوران سرینگر میں۶ء۱ملی میٹر بارش ریکارڈ ہوئی ہے جبکہ قاضی گنڈ میں۸ء۴۹ملی میٹر بارش ریکارڈ ہوئی ہے جو جہاں۲۹مئی ۲۰۱۰میں۸ء۵۹ملی میٹر بارش ریکارڈ ہوئی تھی۔
سیاحتی مقام گلمرگ میں گذشتہ چوبیس گھنٹوں کے دوران ۸ء۱۰ملی میٹر جبکہ پہلگام میں۱ء۱۵ملی میٹر بارش ریکارڈ ہوئی ہے ۔
شمالی ضلع کپوارہ میں گذشتہ چوبیس گھنٹوں کے دوران۲ء۸ملی میٹر جبکہ بانیہال میں۲ء۴۰ملی میٹر اور کو کرناگ میں۲ء۶۲ملی میٹر بارش ریکارڈ ہوئی ہے ۔
ادھر وادی میں خراب موسمی صورتحال کے بیچ شبانہ درجہ حرارت میں کہیں گراوٹ تو کہیں بہتری ریکارڈ ہوئی ہے ۔
دارلحکومت سرینگر میں کم سے کم درجہ حرارت۷ء۶ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۵ء۶ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۴ء۰ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۴ء۰ڈگری سینٹی گریڈ ریکارڈ ہوا تھا۔ایک اور سیاحتی مقام پہلگام میں کم سے کم درجہ حرارت۰ء۴ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۲ء۵ ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت۲ء۵ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۳ء۶ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت۰ء۴ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۲ء۵ڈگری سینٹی گریڈ ریکارڈ ہوا تھا۔
لداخ یونین ٹریٹری کے ضلع لیہہ میں کم سے کم درجہ حرارت۱ء۱ڈگری سینٹی گریڈ ریکارڈ ہوا ہے ۔