سرینگر///
ریلوے‘ مواصلات اور الیکٹرانکس اینڈ انفارمیشن ٹیکنالوجی کے مرکزی وزیر اشونی ویشنو نے ہفتہ کے روزکہا کہ ادھم پور، سرینگر بارہمولہ ، ریلوے لنک (یو ایس بی آر ایل)جنوری ۲۰۲۴ تک مکمل ہو جائیگی ۔
یو ایس بی آر ایل پروجیکٹوں پر بنیادی ڈھانچے سے متعلق کاموں پر تبادلہ خیال کرنے کے لیے سرینگر میں ایک پریس کانفرنس سے خطاب کرتے ہوئے مرکزی وزیر نے کہا ’’کشمیر کو ریل کے ذریعے دسمبر ۲۰۲۳ یا جنوری‘فروری۲۰۲۴ تک ملک کے باقی حصوں کے ساتھ جوڑ دیا جائے گا اور لوگ ان (ریلوے) خدمات کا فائدہ اٹھا سکیں گے۔‘‘
مرکزی وزیر کا مزید کہنا تھا ’’اس روٹ پر خصوصی ڈیزائن کردہ وندے بھارت ٹرین بھی ہو گی۔ یہ ٹرین کشمیر کے موسمی حالات کو مدنظر رکھتے ہوئے تیار کی جا رہی ہے۔ آپ کو ٹرین تبدیل کرنے کی ضرورت نہیں ہوگی کیونکہ یہ ٹرین دیگر پٹریوں پر بھی چلے گی۔‘‘
رواں برس ریلوے کے لیے بجٹ مختص کرنے کے بارے میں مرکزی وزیر نے کہا کہ۵۹۸۳ کروڑ روپے کے بجٹ کے ساتھ، جموں و کشمیر کے لیے ریلوے پروجیکٹوں میں سب سے زیادہ مختص رقم رکھی گئی ہے۔
مرکزی وزیر نے کہا کہ ۲۰۱۴ سے پہلے یو ایس بی آر ایل کے لیے سالانہ بجٹ تقریباً۸۰۰ کروڑ روپے مختص کیا گیا تھا، جسے۲۰۲۲۔۲۰۲۳‘ میں بڑھا کر ۶۰۰۰ کروڑ روپے کر دیا گیا ہے۔
اس سے پہلے وزیر نے بڈگام ریلوے اسٹیشن کا دورہ کیا اور کیرج اینڈ ویگن ڈپو، بڈگام میں ٹرینوں کی دیکھ بھال سے متعلق مختلف طریقہ کار کے بارے میں دریافت کیا۔ انہوں نے ٹرینوں کی دیکھ بھال سے متعلق تمام امور پر افسران کے ساتھ تفصیلی بات چیت کی اور ضروری ہدایات دیں۔
اس کے بعد وشنو نے خصوصی معائنہ کار کے ذریعے بڈگام ریلوے اسٹیشن سے بارہمولہ ریلوے اسٹیشن تک کا سفر کیا۔ انہوں نے ریلوے سیکشن کی حفاظت اور سلامتی کا تفصیلی جائزہ لیا اور بارہمولہ ریلوے اسٹیشن پر مسافروں کو دستیاب سہولیات کے بارے میں جانکاری حاصل کی۔
مرکزی وزیر نے متعلقہ ریلوے افسران کے ساتھ بارہمولہ ریلوے اسٹیشن پر ہونے والے ترقیاتی کاموں پر تبادلہ خیال کیا۔ انہوں نے ریلوے ملازمین سے بھی بات چیت کی اور ’’ایک اسٹیشن ایک پروڈکٹ‘‘ کے ڈرائی فروٹ اسٹال کا بھی معائنہ کیا۔
وشنو نے بارہمولہ کے مقامی خشک میوہ جات کی تعریف کی اور ان میوہ جات کو ادائیگی کے ڈیجیٹل موڈ کا استعمال کرتے ہوئے خریدا۔اس کے بعد ویشنو ایک خصوصی معائنہ کار میں سرینگر ریلوے اسٹیشن پہنچے۔انہوں نے سرینگر ریلوے اسٹیشن پر پارسل آفس کا افتتاح کیا گیا۔ وزیر موصوف نے سرینگر ریلوے اسٹیشن پر ’’ایک اسٹیشن ایک پروڈکٹ‘‘ کے اسٹال کا بھی معائنہ کیا۔