بانڈی پورہ میں لشکر طیبہ کے دو جنگجو اعانت کار گرفتار:پولیس

سرینگر//
پولیس نے شمالی ضلع بانڈی پورہ میں لشکر طیبہ سے وابستہ دو جنگجو اعانت کاروں کو گرفتار کرکے ان کی تحویل سے اسلحہ بر آمد کرنے کا دعویٰ کیا ہے۔
ایک پولیس ترجمان نے کہا کہ جنگجو اعانت کاروں کی نقل و حمل کے بارے میں مصدقہ اطلاع موصول ہونے پر بانڈی پورہ پولیس نے فوج کے ۱۴آر آر اور سی آر پی ایف کی تیسری بٹالین کی ایک ٹیم کے ساتھ مل کر ایک ناکہ چیکنگ کے دوران بانڈی پورہ کے سملر علاقے میں فشریز فارم کے نزدیک دو مشکوک افراد کو روکا۔
ترجمان نے کہا کہ تلاشی کے دوران ان کی تحویل سے دو چینی ساخت کے گرینیڈ اور دیگر قابل اعتراض مواد بر آمد کیا گیا۔ان کا کہنا تھا کہ دونوں کو گرفتار کرکے پولیس تھانہ منتقل کیا گیا۔
گرفتار شدگان کی شناخت ابرار احمد وانی عرف ابو قادر اور دانش پرویز ساکنان سملر بانڈی پورہ کے بطور کی گئی ہے۔
بیان کے مطابق پولیس نے اس سلسلے میں پولیس اسٹیشن بانڈی پورہ میں ایک کیس درج کرکے مزید تحقیقات شروع کی ہیں۔